Дургъби бегIлара вайти секIал сари дунъяличир детаэс ди­рути. Илдани адамтала гIямру дялчIули, тIутIукьякьядирули сари. Ил­дани бахъал арати ва залумти жагьилтира чулахъунили бета­ра­хъу.
Буралли, жявхIейчибад Дагъистан чуйнара дергъла агилизи би­кибси саби. ХIера, бусягIятла замана бетурхуси дявила хасси бал­буцлизирра дагъистанлантани жигарла бутIакьяндеш дирули сари.
Ну акIубси Дахадаевла районна Хуршнила шилизибадра бахъал жагьил уршби СВО-лизи арбякьун. Илдазибад хIябал уршили ВатIан багьандан чула жан кьурбандариб — Ражабов Рабазан ХIясайниевичли, Исупов Шамил Рабазановичли, ХIяжиражабов Арсен Запировичли. Рабазан лётчик сайри, Арсен —разведчик, Шамил — отрядла командир. Илди хIябалра гIяхIгъабза «Гъабзадешла орден»-ничи лайикьбикибтири.
Гьар дус школализир илди гьанбиркахъули дахъал дал­ду­цу­нира дурадуркIули дирар: назмуртала конкурсуни, ве­черти. Школала мякьлаб леб «Игитунала анхъ» бикIуси, гIяхI­гъубзнас хас­барибси мерра. Илар школала бучIантани жа­гати вавни ва ёлкаби удатур. Гьанна хIябъибил дус май баз­личиб дураберкIиб волейболла абзра, сабира бургъанти гьанбиркахънилис багъиш­ла­барибси. Шантала кумекличил школала волейболла хIяз дура­буркIуси майданра жагали балкьаахъурси саби. Ишдус илаб бетерхурси абзлизир 13 командали бутIакьяндеш дариб. Ил­дазибад цаибил мерличи дурабухъун МяхIячкъалала команда, кIиибил – Ставропольла, хIябъибил – Шаласи шила команда. Ил­кьяйда дурадеркIиб къаркъа иргьнила, гиря ахъбурцнила, дуцIла, турникличир дирути жура-журала гьунартала абзанира. Илди лерилра далдуцуни шантанира гIердуциб ва дурабад бакIибтала халаси хIур­мат­ бариб. ГIяхIгъубзни гьанбиркахъули бахъал адамтира гъайбухъун, школала бучIантани назмуртира делчIун.
Илди гIяхIгъубзни лебилра шантала уркIбазиб даимлис мицIирли кавлан.

Мудрикат ГIябдуразакьова,
ДГУ-ла филологияла факультетла 3-ибил курсла студентка