Гьалабван нушачиб Дагъиста халкьла писатель, прозаик, драматург, поэт ва ки­нос­це­нарист ГIяхIмадхан Абу-Бакар акIуб­хIей­чи­рад 95 дикнилис хасбарибси «ба­гьахъ­ни­бала сягIят» бетерхур.
Илизир бутIакьяндеш дариб ав­то­мо­­бильно-дорожный колледжла цаибил курсла студентунани ва илала преподаватель Мадина Одамановани.
Нуни илдас «Дагъиста прозала савли» бикIуси жузала выставка гьалабихьира ва пагьмучевси писательла творчестволичила, илала гIямруличила къантI-къантIли бу­ри­ра.
ГIяхIмадхан Абу-Бакар культурализир гIячихъти къел датурси Дагъиста халкьла цаибил писатель сай. Литературализи илини дебали халаси пай кабихьиб, ил марбирули саби илала дурадухъунти дахъал жузанира.
ГI.Абу-Бакар акIубси сай 1931 ибил дуслизив Дахадаевла районна ГIярбукIла шилизив. Илини Москвализир М.Горькийла уличилси литературный институт ва СССР-ла Главкинематографияла гьаларти сценарный курсани тамандарибтири. Ил республикала «Ленинна байрахъ» газетала редакторли, даргала «Гьалмагъдеш» альманахла редакторли, Дагъиста писательтала Союзла правлениела жавабла секретарьли узули калунсири.
ГIяхIмадхан Абу-Бакарла цаибти белкIани дагьардиубтири 1949 ибил дуслизир «Гьалмагъдеш» журналла бяхIяназир. 1954 ибил дуслизиб Дагъиста жузала издательстволизиб дурабухъунсири илала цаибси жуз – нешла мезла назмуртала «ГIянручI» бикIуси сборник. КIинайс дурадухъун илала цархIилти жузира. ГIяхIмадхан Абу-Бакарла гIямру Дагъиста ва Кавказла художественная литературала заклизир гIячихъси шалдали детаур. Гьан­нара ил билшхIебилшуси ури, сагати на­слубалара уркIби пахрули дирцIахъули, ухули саби.
Литературала творчество илала гIям­ру­ла бекIлибиубси бутIали ва мягI­ничебси баркьудили бетаур. УрегцIали дусла духIнар илини ахIерси культуралис, ил манзил хIербирути цархIилтачирра, дебали дахъал хIянчи дариб. Ил сабухъчевли узусири поэзиялизивра, прозализивра, драматургиялизивра. ГIяхIмадхан Абу-Бакар 12 фильмла, 8 пьесала ва опералис хасбарибси либреттола автор сай. Илала литературала букьур – бубкIуси ахIен. Илини дунъяла 58-дехI мезличи шурдатурти жузи гIелар датур. АрагIебли дунъяличибра илала пагьмуртани адамти тамашабирахъули саби. Гьарли-марли чебяхIти адамтала хасдеш лебси саби – замана аркьукад илала чебяхIдеш гьатIиралра гIячихъсили ва асилсили бетаруси саби.
— ГIяхIмадхан Абу-Бакар 1957 ибил дусличивад СССР-ла писательтала Союзла, 1978 ибил дусличивад СССР-ла кинематографистунала Союзла ва 1980 ибил дусличивад СССР-ла журналистунала Союзла член сайри. Илкьяйдали ил 1966 ибил дусличивад С.Стальскийла уличилси республикала премияла («Даргала рурсби» бикIуси жуз багьандан) ва Дагъистан Республикала пачалихъла премияла (вебкIили гIергъи) лауреатра сайри. ГI.Абу-Бакар Бузерила ХIунтIена Байрахъла, «ХIурматла Лишан», халкьанала Гьалмагъдешла ордентачил, ДАССР-ла Верховный Советла Президиумла ХIурматла Грамотабачил шабагъатлаварибсири.
Балбуц таманбиубли гIергъи, студентуни библиотекала ва отделтала бузериличил тянишбиуб. Чула яргализиб, илдани зумали библиотекализи башес ва илдигъунти далдуцуназир бутIакьяндеш дирес чесиб.