2024 ибил дусла мартла 20-личибадси ДР-ла БекIла ХIукму хIясибли, жагьилтас патриот бяркъ бедлугнилизи белгиси пай кабихьни ва жамигIятла гIямрулизир жигарла бутIакьяндеш дирни багьандан МяхIячкъала шагьарла Собраниела гьалабси жагьилтала парламентла председатель ГIялигъалбацI ХIусейнов пачалихъла шабагъатличи лайикьикили сай – Амет-Хан СултIа уличилси «Жагьилтас патриот бяркъ бедлугнилизи белгиси пай кабихьни багьандан» бикIуси медальличи.
Машгьурси лётчик, СССР-ла кIина Игит Амет-Хан СултIан ВатIайчи халати дигичевси адам сайливан декIарухъунсири. ВегIла ВатIайчи дигичебти, улкала тарихла халаси хIурматбирути, илкьяйдали чеалкIуси наслу ВатIайчи дигичебсили халабикIахънилизи белгиси пай кабирхьути жагьилти лебни дебали дигеси саби. Илдигъунтазивадли ца сай ГIялигъалбацIра.
Дила шилизивад дураухъунси жагьси адам илгъуна шабагъатличи лайикьикнила хабарли уркIи разити хIяланани бицIахъиб. ГIялигъалбацIли, вузаназиб ва ссузаназиб бучIути дурхIначил гьунивиули, илдачил иргъахънила хIянчи дурабуркIули сай. Илини ЧебяхIси ВатIа дергъличила, нушала хала дудешунала гъабзадешличила ва игитлати гьунартачила дархьти баянти гьаладирхьули сай, жагьилти гIилмулизи ахъахъес, багьудлумачил бегIбирахъес, улкалис гIяхIдешлис бузерилизи ахъахъес жибирули сай. Илкьяйдали Украинализиб Россияла дявила хасси балбуц дурабуркIнила мягIничебдешличилара иргъахъули сай.
Гьайгьайрагу, ГIялигъалбацIли жамигIятла гIямрулизирра жигарла бутIакьяндеш дирули сай. СВО-лизир бутIакьяндеш дирути бургъанти гIеббуцес, илдас хIяжатти секIулти асес ибси мурадличил гьаман арц дурчули вирар. Илдасцунра ахIенну, юртлизи цIадикибти, тухтуртала кумек хIяжатти адамтасра вирусигъуна кумек гIеббаахъес хIяракатлизив вирар, илгъуна баркьудилизи жагьилтира битIикIули.
Буралли, ГIялигъалбацIли нушала республикала тах шагьарлизибси жагьилтала политика гIяхIбухъахъес ва гьалабяхI башахъес гIяхIцад цIакьани дяхIчииули сай. Илис гьарбизуни ва бузерилизир сархибдешуни дулгулра!
П.Мирзаева
