Бутрила шилизирадси  бахъал дурхIнала неш НухIова ПатIимат МирзахIяжиевна акIубси сари МяхIячкъала шагьарлизир бахъал дурхIнала хъалибарглизир.

ПатIиматли Бутрила шилизивадси НухIов МяхIяммад ДинбяхIяндовичличил хъали-цIа цадариб. Илдала хъалибарглизиб шел дурхIя: авал рурсира ца уршира леб. Гьанна бусягIят ПатIимат Бутрила шилизир хIеррирули сари. ЯхIчерси, малхIямси, жагаси, адамтачи дигичерси, халкьла хIурматбирес балуси ПатIиматли, сунела шелра дурхIяра абилкьули, илдас гIяхIси бяркъра бедили, илдази багьудира кайсахъули сари.

ДурхIнала дудеш МяхIяммад НухIов биалли, ВатIа хъархIерагардеш балтахъули, СВО-лизив ургъули сай. ДурхIнала челябкьла паргъатси биахъес, чеабиуси наслу мяхIкамбарес, даршудеш батахъес багьандан, сунела арадеш мяхIкамхIебарили, гIямрулис урехи лебни балули хьаллира, ил сай гIяхIъулали ВатIайс къуллукъбарес арякьун.

СВО-лизи арукьяйчи МяхIяммад НухIов шила хозяйствола техникумра таманбарили, Бутрила шилизив хIяйвантала тухтурли узули калун.

Илдала халалгъуна рурси 5-ибил класслизир ручIули сари, виштIалгъуна урши авал дус виубли сай.

Илдала хъалибарг цархIилтас гIибратли бетаурли саби.

Бутрила шилизиб ил хъалибаргли халаси хIурмат сархили саби.

МяхIяммад НухIовла неш Зулейхат Бутрила шила администрациялизир рузули сари. Илра сунела уршила дурхIни абикьахъес багьандан, сунезибад лябкьусигъуна барес къайгъилизир сари.

МяхIяммад НухIовлис жяв-жявли чедибдешличил, ара-сагъли сунела бегIтачи, дурхIначи ва хъалибаргличи чарухъес кьадарбиахъаб ЧевяхIси Аллагьли!

Илкьяйдали, дергъ таманбиубли лебилра нушала бургъанти ара-сагъли хъули чарбухъаб! Чула гIямрулизир арадеш, шишимти хIедиубли, дурхIначил разили, яшавлизиб гьарзадеш биубли, сархибдешуни имцIадикIули хIербиэс кьадарбиаб чус или дулгес саби нушаб кавлуси!

С.ГIябдуллаева