Баршамайла шилизивад дуравхъунси, политикалашалти гIялимуртала кандидат, 55 дус виубси Абакар Абакаров, суненира сай гIяхIъулали Украинализиб бетурхуси дявила хасси балбуцлизир бутIакьяндеш дарибси, нушала гIярмияли Чедибдеш сархниличи вирхули сай.
Муниципалитетла пресс-службаличилси ихтилатлизиб илини сунела пикри буриб: «Ириъ августличив ну гIяхIъулали СВО-лизир бутIакьяндеш дарес арякьунсири. Ну гIяхIцадхIи пачалихъла декIар-декIарти къуллукъуначив узули калунра, амма ВатIайс къияндикибхIели, шайчив калес хIейубра.
Дила пикри хъалибарглира гIеббуциб. Наб бурес дигуси, улкала Президент — Верховный главнокомандующий – В.Путинна хъарбаркьуни нушала гIярскуртани устадешличил ва урехиагарли детурхахъули сари. Чилалра ташмимшдеш агарли, Чедибдеш нушала бирар».
БусягIятла замана Абакар Абакаровли Херсонна областьлизиб кабикибси дявилизир диахъубти дяхъурби сагъдирахъули сай.
«2023 ибил дусла октябрьличив Херсонна областьла Клин шагьар багьанданси дявилизиб, десантла-штурмовой балбуц дурабуркIухIели, нушала гIяскуртани Чедибдеш сархибсири. Илав ну декIли вяхъибсири. Гьала-гьала госпитальлизив сагъирули, кIинайс – декIар-декIарти хасти учреждениебазив арадеш къулайбирули левалра. Дила арадеш ункъбиубхIели, тухтуртани се бурул хIердикIехIе. СВО-лизи урхьурал яра…», — викIи Абакар.
Бурес чебиркур, гIярмияла къяяназиб къуллукъбарили гIергъи, Абакар Абакаров «Куйбышевла уличилси дявила академиялис – 50 дус» медальличил шабагъатлаварибсири. Москвализиб ва Владимирлизиб чебяхIси даражала багьуди касили гIергъи, Абакар федеральный антимонопольный Комитетлизив специалистли узули калун. Ил 12 дусличивра имцIали ДР-ла милллатла политикала багьахънибала ва дуралати бархбасунала шайчибси Министерстволизив узули калун, 10 дусличивра имцIали — ДР-ла избирательная комиссияла пресс-службала руководительли. ГIур Федерацияла, регионна ва муниципалитетла выборти дурадуркIни багьандан, РФ-ла пачалихъла бекIлибиубси избирательная комиссияла шабагъатличи лайикьикибсири. 2013 ибил дуслизиб Абакар, ДР-ла гьаларти къуллукъуни ва дахъал дусмазиб сабухъчебси хIянчи барибни багьандан, ДР-ла Президентла уличилси сягIятличил шабагъатлаварибсири. Абакар Абакаров СКФО-ла шайчибси Россияла тIабигIятличи хIеруди бузахъуси Департаментла багьахънибала-анцIбукьуни баяндирнила отделла начальникли узули калун, илкьяйдали илизир Россияла тарихла ва адам ишхIелла жамигIятлизиб хIериахъес бурсивирнила бетуц руркънила преподавательла устадешра лер.
Хайдакьла районна администрацияла пресс-служба
