Дила дурхIядеш маш­­гьурси Куба­чи­ла шилизир шал­гIер­ду­хъун. Дила гъамтачи дубурла ши­ли­зи ва диркьала мер-мусаличи ша­дибгьунчи дашутири нуша бегI­тачил ит­хIе­ли. Илкьяйдали дила хIул­ба­ла гьалаб лебил дунъя талихI­ли парчбикIусили ва даршудешла зак­лиуб рурхIусиван билзусири. Би­­кIу­ливан, мургьи-арцлизи гIе­­лака­­бикибти гIярбу­кIан­та­ла, ахъти дубуртала бургачиб ха­бар­ла чIакниван хIербирути сир­хIян­­тала, цIедешла унхъразиб Гьал­жанализибван хIер­бирути дир­кьалантала гIямру гьа­чамалра кьисматли анцI­кьи-децIлизи гIелахIедуршу или гьан­биркусиригу итхIели. Се­пайда,…
Аязси бархIи къукъу-рям­кьярван нушала даршуси улкала адамтачи гьала-гьала ковидла изай чябхъинбариб ва бахъла гIямру къябаиб. Иличирра вайти анцIбукьуни дирути хIедургар или пик­ри­дикIути нушачи дявила хасси балбуцли лебгIеб вайси асар бариб. Дубурлантани бурули бираргу, дургъбани урши хIеркьу, левсира кевису или. Ил хIякьикьат гьанна нушала хIулбала гьалаб багьарбиубхIели, нуша цIакьагартили ва кьисматличил баришкадирутили детаурлира. Гьарли-марли, се барес дирутира нушани, гIядатла дубур­лантани, фашизмала уряхIти гIела-гьа­ла­диклумани чула агъули тудикIути бурги ахъдуцили диалли?
Украинализиб дявила хасси балбуц бехI­бихьибти бурхI­назирал нуша пик­ри­дикIутири илди ишбархIи яра жагIял тIаш­дилзан или. Сепайда, нушала хабарла гIярмияли Гитлерла хуразирад, чула гIязиз жан кьурбандарили, дерцахъибти улкни дархли нушачи къаршили кадизниличи тамашахIейэсра хIейрар. Ил цIахси ва убяхIси баркьуди чебиухIели кахдирулра. Нушала игитти уршбани дахъал цадиубти улкначи къаршили игитти баркьудлуми дурадуркIути багьадуртачи пахрулира дирцIулра.
Сеннира уркIи баришбирули ахIен СВО-лизир бутIакьяндеш дирути жагьти бургъантала хIябри имцIадикIниличил.
… Гьаларван ну къарширикира Дахадаевла районна Ирагъила шилизивадси ГIяли ГIялихановла гъамтачил. Илала кьисматличира дявила анцIбукьунани кахси асар ба­рили уббухъун.
ГIялиханов ГIяли ХIясанхIу­сенович акIубсири берхъибси хъалибарглизив 2000-ибил дусла октябрьла 16-личив. Ирагъила шилизиб урга даражала багьуди касили гIергъи, Благовещенсклизибси Советский Союзла маршал К.Рокоссовскийла уличилси Дальневосточный дявила цахIнарти гIяскуртала училищелизи керхур. 2022 ибил дуслизиб ил ункъли хъараахъурли, лейтенант ГIяли ГIялиханов Хабаровский крайла Бикин бикIуси шагьарлизи ВатIайс къуллукъбарахъес вархьибсири, гIур илавадли СВО-лизир бутIакьяндеш дарахъес вархьибсири. Илав ил командир сайрину, солдатуни берцахъес или гьалаверхурхIели, декIли вяхъибсири. Арадеш къулайкабиубли гIергъи ил Украиналара Белгородла областьлара ургабси дазуличиб взводла командирла къуллукъбарахъес вархьиб. Дявила хъарбаркьуни тамандирухIели гъабзадеш дакIударни багьандан ил гъабзадешла орденничил, кIиибил даражала дявила асилдешла ва цархIилти медальтачил шабагъатлаварибсири.
Августла 23-личив хъайчикайибсири ва кIел бархIи шилизив кали гIергъи, дявила частьлизи чарухъунсири. Сентябрьла 2-личив ирагъилан урши алхунсири.
Илала виштIал узинира ГIя­ли­лагъуна дявиласи сани­гIят чеб­бикIиб ва Санкт-Петер­бург­лизибси инженерно-техни­чес­кая академиялизив учIули сай.
ГIяли ГIялихановла гъамтачилси ихтилатлизиб илдани балахъулри:
— Нешлизи илини бурибсири мекъ кIинайс бирис, дила солдатуни чичи хъарбарили батиша гьатIи, ну шилизив вахъхIи каласли или. Амма бегIти чебхIебикиб ва шел бархIилис ил отпускличи вакIибхIели хъайчикатурсири.
ГIялини бурусири дила солдатуни нарядличи бархьасли бускалули саби, ва илдас кьадин ну вашес хIяжатбиркули саби или. Илкьяйдали нарядличи вякьунхIели сайри ил алхунсира.
Илини сунела солдатунас кумек гIеббиахъули, кредит бархли касни баянбиубсири ил вебкIили гIергъи. Илис илцадра дигутири солдатуни, хIятта илди сунела уршбиван ва узбиван ахIербирутири.
Гьайгьайрагу, нушани илди­гъун­ти багьадуртачила хъумхIертехIе. Амма дявила анцI­­букьуни даимдиахъес къай­гъи­лизибти дахъал улкнала мехIе дерхIибти бургала гIякь­лу­а­гардешли тамашавирахъули сай. Адамтала гIямру къябаэс или бузути илдани чис гIяхIдеш бирусил багьес гьамадли ахIен. Гьачамалра чисалра мукIурхIебакIибси ва чебяхIси нушала улкаличи къаршили дурадухъунти улкнала бурганикIун иргъули ахIен гIяшуллизирадли цIа мурталра цаван дурадиркниличила. Илдани хъумартурли бургар нушала хала дудешунани секьяйда фашистунала къур гIеббердахъили, лебилра дунъяла халкь лагъдешлизибадлира балагь-кьадуртазибадлира берцахъибти­рил. Фашизмала нажасунала сеннира гIела-гьаладиклуми кали урдухъи сари, ва гьаннара илдани нушала цIакьси улкаличи някъ ахъбуцниличи пашманбирниличи умутуни лер нушала. Сеннира чедибдеш нушала бирар ва даршуси заклиуб чеалкIуси наслула вакилти хIулкIули хIер­бир­ни­личи дирхехIе, дила дур­хIя­деш­ла манзиллизибван.