Ассаламу гIялайкум ахIерти дарганти, журналистикала ветеранти, дархкьяби ва «Замана» газетала марти гьалмагъуни!
УркIи-уркIиларад хIуша лерилра мубаракдирулрая мягIничебси байрамличил, республикала «Замана» газета дурабулхъес бехIбихьибхIейчирад 105 дус дикниличил.
105 дус — кагибси лугIицун ахIен, даршдусличибра имцIали «Замана» ункъли бузули, дурабулхъули ва халкьлис сагати белкIани ди­а­хъули сари. Илди 105 дусла духIнар «Замана» газетали Дагъиста тарих, культура, регионнизир ва улкализир ка­диркути анцIбукьуни чедетаахъили сипатдирулри. Газе­тала бел­кIаназир даргантала чедибдешуни ва сархиб­дешуни ункъли чедиу.
Илала дурабад, «Замана» — дарган мезличил дурабулхъуси лебил дунъяличибра лебси цайли цаси республикала газета саби. Нушала газета ишбархIира марли кавлули саби сунела бекIлибиубси мурадлис — халкьлис къуллукъбирес, нешла мез мяхIкамдирес ва ункъдирес, миллатла тарих ва культура наслуличирад-наслуличи диахъес. ИшбархIи наб халаси баркалла багьахъес дигулра, журналистунас, отделла редактортас, тилмажунас, корректортас ва «Замана»-ла лебилра хIянчизартас, бусягIят бузути ва бузули калунтас.
Илдани иш манзиллизирра чула гьалабла бархкьябала гIядатуни даимдирули сари, чузирра давлачебси букьур ва ишбархIила журналистикала ва лугIурбалашалти тяхIурти цахIнадирхъули. Нуша ишди дусмала манзиллизир уркIи гьаргли ва умули кавлулра, илкьяйдали рухIла давла — нешла мезра мяхIкамдирули ва тIинтIдирули.
Илкьяйдали баркаллала дугьби дурес дигулра «Замана»-ла юлдашунас, автортас , пачалихъла ва жамигIятла хIяракатчибас, чулира газеталис гьар мурталра кумек гIеббиахъутас.
Лебтасалра арадеш, даршудеш, творчестволизир гьарбизуни дулгулра, хаслира — нушала мез ва Дагъистан Республика ункъли гьаладяхI дашахънила баркьудилизир!