Улкалис бегIлара къиянти замунтазиб нушала халкьли мурталра цадеш дакIудирутири. БусягIятла заманара, Западла улкнас Россияла хъархIерагардеш бячес дигули, лерилра чула цIакьани дяхIчииухIели, неш-ВатIа гьар гIямзилабадти халкь цабиубли, нушала бургъанти гIеббурцес даимбиубли саби, чули бирусигъуна кумек гIеббиахъули ва чедибдеш сархнилизи белгиси пай кабирхьули. Ил ахIену ВатIайчи диги дакIудирнила лишан?
ВегIла ВатIан балтахънила хIекьлизиб гIярмия чараагарли хIяжатти дявила гIягIниахълумачил гIеббуцни дебали мягIничебси саби. Илдазирад цадехI сари бургъанти дигIянабиркахъес, дявила техника ва ярагъ кIапIдарес пайдаладирути маскировочные сетани. Сетанала гIяхIдешличибли бургъантала жан дерцахъес имканбикIуси саби. Илди ВатIан балтахъантас хIярхIя хIелтIуси жилетван (бронежилет) яра тяхъияван (каскаван) хIяжатти сари.
Нушала республикала декIар-декIарти мер-мусаличир СВО-лизир бутIакьяндеш дирути дубурлантас маскировочные сетани дирути майдунти дузесаили сари. Буралли, республикализиб ил хIяракат бехIбихьибси саби «Диалог» центрлис бекIдеш дируси Зайнаб Рашидовани. Илала кирила баркьуди гIеббурцули, бусягIятла замана Дагъиста декIар-декIарти районтазир ва шагьуртазир гIяхIцад майдунти дузули лер. ХIера, илдазибад ца саби «VIP Кулинария». Центрлизиб хасси майдан ДР-ла Халкьла Собраниела депутат, филологияла гIилмуртала доктор, ДГУ-ла преподаватель ХIясанова Узлипат ГIусмановнала сипталичибли абхьиб. Илала сипта гIямрулизиб бетерхахъес халаси икьалабирули сари центрла гендиректор Мирзаева Кумсият Саламовнанира. Узлипат ХIясановала къайгъначибли майдайчир хIяжатти гIягIниахълуми дакIудиуб: чIянкIи ва илди думхуси станок. Депутатли буруливан, сетани дирнила хIяракат бехIбихьибхIели, илизир жигарла бутIакьяндеш дариб МяхIячкъалала дурхIнас хасбарибси 2-ибил поликлиникала хIянчизартани, илкьяйдали сунени бучIахъути студентунани, СВО-ла бутIакьянчибала хьунрани ва гъамтани.
Иличила нушани багьурсири Узлипат ХIясанова газетаби къулбасдарес ибси мурадличил «Замана» газетала редакциялизи гьарракIибхIели. Депутатла шалати пикруми гIердуцес ва нушала бургъантас кумеклис дурхьути сетани дирнилизир бутIакьяндеш дарес нушалара иштяхI акIубсири. Амма гьанналичи бикайчи, ил бетерхахъес имканхIебакIиб. Ва, хIерая, гьалабван, нушала газетала коллективли ил центрлизи архIя дураберкIиб ва дебали мягIничебси баркьудилизир бутIакьяндеш дариб. Буралли, маскировочные сетани дирнилизир дигалли дурхIнани, дигалли халатани бутIакьяндеш дирули сари. Лерилра нуша ца мурадли цаладирхъулра – нушала бургъанти гIеббуцни, илдас гьамаддеш биахъни, чедибдеш сархни.
«VIP Кулинария»-лизи адацIибхIели, центрлис бекIдеш дируси Кумсият Мирзаева ва журналист ПатIимат Тазаева нушаб разили, дяхI шалали гьунибаиб. Буралли, илди саби ишбархIи депутатла цаибти кумекчибира, илала гьарил балбуц бетерхахъес икьалабирутира. Илдани центрлизиб нушаб экскурсия дураберкIиб, Кумсият Мирзаевани хурегуни далкьарахъути курсаначила буриб, илаб бузути специалистуначил, бучIути рурсбачил тянишдарира ва, илкьяйдали хасти сетани думхахъесра бурсидарира. Ил центрлизирти хъулри багьудлуми касес хIяжатти лерилра шуртIрачил гIердуцилри. Хъулиб беркала бирухIели пайдаладирути лерилра гIягIниахълуми даргес вирулри илар: ваяхIличибад бехIбихьили, лерилра кьям-кIуцIулличи бикайчи. Илдигъунти аги-кьяйдализиб, гьайгьайрагу, рурсбас чула хъулибван шикькабикIес, хурегуни далкьарахъес ункъли бажардибиркур.
Нуша хурегуни далкьарахъуси хъули адацIибхIелира, илабти мугIяллимти ва бучIанти мирхъила тIакьализибван абархилри. Илдани ил бархIи далкьарахъулри бизити хурегуни ва муридешуни. Алавчарли тIинтIбиубси бизиси тIемличил багьеслири илдани лерил секIал гIяхIил детурхахъни.
Кумсият Мирзаевани багьахъурливан, чучир багьудлуми ва устадеш касибти адамти улкала бегIлара гIяхIтигъунти ресторантазиб, кафебазиб бузес бажардибиркули саби. Илала гъай хIясибли, гIямрула дусмачи хIерхIеили, багьудлумала гIевдухьлизиб гьариллис хурегуни далкьарахънила шайчир бурсидеш гIерасес имканбикIули саби. Центрлизи алавбуцибтани мурталра жигарла бутIакьяндеш дирули сари халкьани-ургарти декIар-декIарти фестивальтазир, конкурсуназир, мажлисуназир. Иличи че, илди бажардибиркули саби халати сархибдешунира диахъес. Илис бикьридеш дирулри центрла бяхIянази даршибти лугIилашал дахъал грамотабани ва цархIилти шабагъатунани. Илкьяйдали бяхIяначи даршибти суратуназибад нушачи хIербикIулри дунъяличибра машгьурбиубти хурегуни далкьарахъути устнира. Илдачил къяйли чериулри Кумсият Мирзаевара. ХIера, иличибли балулра нушани центрла директорла санигIятлашалти пагьмула чихъдеш.
Буралли, центрлизиб СВО-ла бутIакьянчибала гъамтас матъал багьудлуми касесра имканбикIули саби. Илдигъунти мисалти чумра лер, илдачила гьанбуршули сари Узлипат ГIусмановнанира.
«Центрла мер-мусаличир нушани Хайдакьлизибадти, СВО-ла дявила чебла ихъули, алхунти бургъантала хьунрачил ва нешаначил (10-11 адам) даим гьунибаъниби дурадуркIулра. Ила бакIибтас Кумсият Мирзаевани чула центрлизир матъал багьудлуми касахъес имканбикIахъути, хасти сертификатуни дедиб. Илди хьунул адамтазирад цали биалли, сунени илис гьалар хурегуни далкьарахънила шайчир багьудлуми касили руилри, илис – чеимцIаси, цархIил бяхIчибизла белчIудила сертификат гьалабихьибсири. Нушала адамти гIеббуцили, илдигъунти савгъатуни дирнилис Кумсият Саламовнас халаси баркаллара багьахъес дигулра.
Илкьяйдали гьала-гьала маскировочные сетани дирес дехIдихьибси манзил, нуни жибарибтири ДГУ-ла Дагъиста филологияла 2-3-ибти курсанала даргала кьукьназиб бучIути студентуни. Илдасра Кумсият Саламовнани хIябал бархIила курсанала сертификатуни дедибтири, берклуми далкьарахънила дигIяндешуначи бурсибиахъес багьандан», — буриб депутатли.
Ишаб гьанхIебушес хIейрар центрлизиб мерлабиубси миллатла культуралис хасбарибси гIямзиличилара. ПатIимат Тазаевани буриливан, центрлизи гьаббикIути туристунас ил дебали дигуси мерли бетаурли саби. Гьайгьайрагу, ил хIейгахъесра хIейрар, сенахIенну илар нушала хала бегIтани пайдаладирули калунти гIягIниахълуми гьаладихьилри, чулира нушала миллатла культурала жагадеш сипатбирути. Илар лерри жагати хъабни, цIикрумани шинничи дихути къянурби, кьалтинти, хайдакьла някьишличил делкIунти чIянкIурби, миллатла палтар ва гIуррара дахъал цархIилти секIал. Ила ацIибсилис минутла манзиллис гьар-урла гIямрулизи ухIнаверхурсиван кабилзулри.
Дигесли саби илдигъунти, къулайти шуртIрачил гIердуцибти ва шалати хъулразиб цагьатIи багаласи баркьудилисра – маскировочные сетани лушнилисра хьулчи кабихьни.
Сетани дирнила башри гьамадси ахIенри. Гьаланачи илис хьулчи кабихьес хIяжатлири, кIинайс – хасси чIянкIи кьицIбарили хIядурбарес. ЦабехI кьицIбикIули, цабехIли кьицIдарибти думхули, сабухъчебси хIянчи бетарулри. Илгъуна баркьудилизир бутIакьяндеш дарес имканбакIниличи дебали разилира, сенахIенну илала мягIничебдеш гIячихъли иргъулра.
Дубуртар Улкала асилти уршби ва рурсби ишбархIи нушаб азадти гIямру диахъес, бекIла чедибси зак умули калахъес, гIязабтазибти адамти берцахъес бургъули саби, ил багьандан цахIнабси баркьудилизи гьарилли вегIла ахърибикIусигъуна пай кабихьни лайикьли чебиулра. «Замана» газетала коллективли дарибти маскировочные сетани нушала бургъантас багаладирниличи, илдачи нушала някъбала ванадеш биъниличи дирхулра. Ца ургъанна гIямру дерцахъес имканбакIалра, нушала къайгъни дугIли архIякьян!
Салимат ГIялиева, ПатIимат Мирзаева
