Гьалабван бетер­хур­си ха­ласи мягI­нала бал­буц­ли­чила белкIи сари «Да­гес­танс­кая жизнь» га­зетализи ТIа­гьи­рат ХIя­сановани. Ил балбуц багъиш­лабарили саби Рос­сияла БархIилис, сунезирра бутIакьяндеш дарибти Мя­хIяч­къала шагьарла бекI Ж.Са­лавовли, шагьарла де­пу­татунала Собраниела пред­се­­да­тель Х.ГIялиевли, «Ин­тер­­бри­гадалис» бекIдеш ди­руси М.Му­­­тIалимовли ва ба­хъал цар­­­хIилтира жаваб­ла хIян­чи­зартани, саби-гIяхIъу­лали СВО-ла бутIакьян­чибас кумек бу­чи­­ли, нушала бур­гъантачи би­ахъан­ти.
Пахрубаресли саби илгъуна мягI­ни­чебси анцIбукьлизир бу­тIакьяндеш да­рибти-ургав левли виъни нушала, Ахъушала районнизивадси ГIяли-Ас­хIяб МяхIяммадовра, сайра ко­мандирла заместительли сайси ва 31-эсил архIя­лизир бу­тIа­кьяндеш дарили чарухъунси.
«Дагестанская жизнь» га­зетализи кабяхъибси белкI чебаибхIели ГIяли-Ас­хIябличил сагали ихтилатбарес хIяз­духъун ва мурталра кьяйдали разиси, гIяхIти уркIи-хIялла вегI, игитдешла баркьудилизив хабардерхурси усан гъабза районна администрацияла юртла гьалав къаршиикибхIели, цакамси заманалис гъайрухъес бикиб.
— Дявила хасси анцIбукь­лизир Россияла челябкьла багьандан чула жан ахIе­рахIедарили бургъутас бучибси кумекличилти авал фура лерри пло­щадь­личи кили, — буриб ГIяли-Ас­хIябли. — Илдачир лерри берк-берж, шин, дармунти, генераторти, мотоциклти, къантIли буралли, гьалар нуша дякьун­хIели бургъантас имцIали хIяжатли сартиван чули гьандушибтира халкьли чула къайгъиличил дучибти секIалра.
Дявила хасси балбуц бетурхуси мер-мусаличибцунра ахIи, алавчарлира аги дебали паргъатагарсили бетаурли сабхIели кумек бухили аркьутас мяхIкамдешлис пуле­мёт­чи­куни декIарбариб, ца—бегI гьалабси машиналичив, кIиэсил—бегIлара гIер­гъи­силичив лебтири.
— Кумек архули аркьутас, машааллагь, чилра ва селра дир­гала­хIе­бухъи, Донецкла ва Луганскла областунала мер-муса ахъили, бургъантачи детаэс бикиб, — буруси даимбариб ГIя­ли-АсхIябли. — Кумек баахъира Лугансклизибси госпитальлизи, «Каспий» батальон, «Терек», «Скифы», «Балтика» бикIути ва цархIилтира отрядуни дургъути, разведчикунала отряд лебси мер-мусаличи. Гьунчир тIашхIедизурли дашес багьандан, баарила кьадар солярка хIяжатлири ва МутIалим МутIалимовли сунела шайзибад гьарил фуралис 500 литр хIясибли солярка им­цIа­барахъиб.
Ростовла областьлизиб хIербирути дальнобойщик ГIялихан Исякьовли ва Мя­хIям­мадзагьир ХIяжиевли, сабира ГIя­ли-АсхIябла юлдашунили сабти, чула шай­зибад УАЗ машина кумеклис бархьиб.
Бургъантас кумек бурчнилизиб халаси къайгъи дакIубарибти адамтала умира гьандушили сари «Дагестанская жизнь» газетализир. Илдазивад цаибил сай «Стройлайн» ООО-ла генеральный директор МяхIяммадзагьир Ибрагьимов. Гьанбушили саби Ахъушала районнизибадти кумекчибира — «Усиша» СПК-лис бекIдеш дируси ХIяжи Рабазанов ва ил СПК-ла бухгалтер Хамис ХIянаева, ХIинтIала шила администрацияла бекIла къуллукъуни дузахъуси Зубайдат БяхIмудкьадиева, МухIела гимназияла директор МяхIяммад СалихIов. БелкIлизир уми гьандушили хIедиалра, баркалла балахъули саби хъулир дерцIибти кьуцIри, полотенцеби, футболкаби, бурушуни ва гIурра дахъал секIал дучили дархьибтас.
АрхIяличирад чардулхъу­хIели вархси водитель зягIипвикили, гьуни набцун ахъес чебуркъуб ва, дебали вамсурли вииши, МяхIяч­къа­лализи саибхIели ГИБДД-ла хIянчизарти селичи ташмишбикибал, цаибил постличив тIашаира, — гьанбиркахъули сай ГIяли-АсхIябли. «Бержили хIейиши?» — или гъамиуб старший лентенант. Чи сайрал, чинад чарулхъусирал бурибхIели, алавчарли жагьилти цалабиркесбяхIиб, «нушанира кумек­бирехIе» бикIули, хIурматличил гьунив­ватурра. Телефонтала номертира гиб. ХIера, илдигъунти саби нушала адамти!
Бурес гIягIнили саби ДР-лизиб 1999 ибил дуслизибал акIахъубси «Народное ополчение. 1999. Интербригада» ибси уличилси жамигIятла организациялис бекIдеш дируси дарган гIяхIгъабза, Дахадаевла районнизивадси МутIалим Му­тIалимовла хIерудилиуб лебилра миллатунала, шагьуртала ва районтала вакилти цалабикили, СВО бехI­­бихьибхIейчирад ишбар­хIили­чи би­кайчи къиянти аги-кьяйдализиб, саби гIя­хIъу­лали дуракабухъи, бургъантас кумек гIеббурцули бузули биъни­личила. Ил­хIелира «Интербригадала» бутIа­кьянчиби бетиули саби дяви бетурхути мер-мусаличи, чедиули сари иларти шуртI­ри, балули саби, сегъунти тяхIяр-кьяй­дализиб бургъес чевкъулил Россияла бургъантас.
Россияла БархIила хIур­мат­лис дура­бур­кIуси архIялис кумек бурч­нилизи халаси пай кабихьили саби МяхIячкъала шагьарла бекI Жамбулат Салавовли, илала заместительтани, управлениебала ва отделтала начальникунани, учительтани, тухтуртани, пенсионертанира балли.
Дармунтала шайчиб халаси кумек бучили, бархьили саби Каспийск шагьарлизибси медучилищела директор Асият ГIямаровани ва илала заместитель Ольга Албуриевани. Илгъуна кумекра илдани бегI гьалаб буили ахIен бархьибси, — гьаларра чуйнара медицинала гIягI­ниахъ­лумира дармунтира дархьибти сари.
СВО-ла бутIакьянчибас бурхьуси кумеклизи гIяхIси пай кабихьили саби Лавашала районна жавабла хIян­чи­зар­танира, илдала лугIилизиб—судьяби ГIяли МяхIяммадгIялиевли ва Тимур Мя­хIям­ма­довли, УБЭП-ла начальник ХIяжимурад Юсуповли.
— Тамашала адам сари нушала Зубайдат БяхIмудкьадиевара: се гIягI­­­­нилил хьарбаили, камси заманала духI­нар гьар секIал хIядурдиру, — ви­кIу­ли сай ГIяли-АсхIяб. — Иличила сунечила­цун декIарли белкIес гIягI­нисири. Ар­хIя­личи хIя­дурдикIухIели бургъантани хахъес хъар­дарибтири кьелхIнира хъат­к­­нира. Про­дуктунала дурарад, Зу­бай­­датли ил­ди­ра хIядурдариб дарш-дар­­шал хIя­сиб­ли.
СВО-лис кумек гIеб­би­ахъу­тала лугIилизиб ГI.-А.МяхIям­ма­довли гьанбуршули сай тукентала бегIти Чарак ГIялиев, Шамил Мур­тазагIялиев, МухIела хIяб­кьяйчибси «Лабиринт» би­кIуси туке вегI ГIябдулла ГIя­ма­ров, гIур­ра чумилра предприниматель ва ту­кентала, заправкабала бегIти, сабира цаибти бурхIначибад илгъуна чебяхIси бар­кьудилизи ахъибти.
Кумек бурчутасра баркалла, ил сунела мерличи биахъутала гьунарра, адам­дешра буресагарли ахъли диънили­чила гьарилли аргъесли саби, — сецад урехила шуртIразиб аркьулив ва чарбулхъулив илди къиянси архIяличибад! Кьудратла ВегIли мяхIкамбараб лебилра—даргантира цархIилти миллатунала багьадуртира!
ГIергъиси замана лебилра Россиялизиб дурабуркIули саби «Все СВОи» ибси уличилси балбуц. Илгъуна балбуцлис гIибратли бетаурси «Интербригадала» баркьуди саби или буралра хатIа бетхIерар, сенахIенну цаибтала лу­гIилизиб СВО-лис кумекбирес бехI­би­хьибти ва ил кумек хIяжатси мерличи бетиахъути дагъистанланти сабри. Илди-ургаб Ахъушала районна вакилтира лебли биъниличи пахрубаресли саби.
Гьарил архIя гьарбизурси уббухъаб ГIяли-АсхIябла ва сайгъунти гIяхIгъабза юлдашунала! Даршуси замана чесабаайчи мяхIкамли бихIяб бургъантира илдас кумекбикIутира Кьудратла ВегIли!
(Ишаб наб цагьатIи секIайчила гьанбушес дигулра. Гьалабван «Замана» газетализиб дурабухъунси белкIла «Сен патриотизм гъайлизибцун кавлули?» — ибси у кьабулхIебикиб, сенахIенну пат­рио­тизм гъайлизибцун кавлули биаллири, чедир гьандушибти гъабзадешла ва Ва­тIай­чи дигила анцIбукьуни диэс дирути ахIен­ри.
Ил белкIлизир гъай нешла мезличила сари. Дила пикрили, «Патриотизм» иб­си девла мягIна биалли иш­бархIи неш­ла мез­личилван ахIи, СВО-ла анцI­букьуначил, илаб бургъути гIеб­бурц­ни­ли­чил имцIали бархбаси саби. Ил сабабли белкIла у цархIил биэс гIягI­ни­ли бурги, «патриотизм» ибси дев барх­хIе­басахъи.
ИлхIелира пикрибарили, СВО бехI­би­хьиб­хIейчибад бегIлара бахъал гъабзадешличил бургъутира, Россияла Игитла у касибтира, бургъантас ва илдала хъалибаргунас кумекбикIутира ДР-зибадти сабнира, цаибси Игит дагъистанлан виънира. Илди секIал хIисабдаралли, «патриотизм ка­гъуртазиб кавлули саби» или викIес хIей­рар.)