Кьурбанова Загьраула ИльясхIяжиевначил ну тянишриубсири 20 дус гьалар, культурала КIялгIялизир рузухIели. Культурала управлениела шимазирти учреждениебазиб дахъал дусмазиб хIялалси хIянчи барибти, хIурматчебти, чули касибси санигIятличи балбикибти бахъал адамти лебти саби. Гьанна 15 дус ну ил управлениелизир рузули ахIенра, амма бахъал гIяхIти адамтачил тянишдеш калун дила. Илдазирад ца сари Загьраула Кьурбановара.
Загьраула ИльясхIяжиевна акIубси сари АметеркIмахьилизир гIядатла хъалибарглизир.
Загьраулала лебти саби кIел рузира ца узира, илди бегIтани гIяхIси бяркъра бедили, халкьла хIурмат ва бузерила кьиматбирахъес бурсибарили, гIямрула гьунчи дураиб.
Загьраулани сунела бузерила гьуни бехIбихьиб 1990 ибил дуслизиб АметеркIмахьилизибси библиотекализир рузули. ИлхIейчирад ил библиотекализир рузули бузерила 36 дусла стаж абикили саби.
ХIялалли, сунечи хъарси хIянчи чебетаахъили, жавабкардешличил бекIбирули рузули, сунела бузерила гьуни даимбирули сари илини. Библиотекализи жузи делчIес дигули дугьабизурти дурхIни биаллира, халати адамти биаллира, илди жузачил, илдала автортачил тянишбиру, илди делчIахъес иштяхI алкIахъу, сегъуна художественное произведение гIяхIсил бурули сари.
Сари рузуси библиотекализир лерилра тарихла бяхIянас, байрумтас, жузала юбилейтас, пагьмучебти адамтас багъишладарибти далдуцуни дурадуркIули рирар. Илди далдуцуназир бутIакьяндеш дарес адамтира разибиркур. Библиотекализир лер жура-журала жузала выставкаби, ЧебяхIси ВатIа ва Афганиста дургъбала, Украинализибси дявила хасси балбуцла бутIакьянчибала суратуни, илдачила белкIани, стендани, плакатуни. ДурхIначил дахъал ихтилатуни дурадуркIули сари гIямрула бархьси гьунчибад чебхIебухъахъес, наркотикуни, терроризм, экстремизм сегъунти секIал сарил иргъахънила хIянчи дурабуркIули. Илкьяйдали, иш манзиллизиб бетурхуси СВО-лизиб нушала районнизибадти ва цархIилти мер-мусаличибадти бутIакьянчибала гъабзадешличила, ВатIанра, халкьра багьандан секьяйдали чула жан ва арадеш ахIерахIедарили бургъулил бурули сари. Илдигъунти ихтилатунала мягIна саби чеабиуси наслулис патриотдешла шайчибси бяркъ бедес, вайла-гIяхIла мягIна багьахъес багьандан.
Загьраулани ВатIайс мардеш дихIнилис, бархьси, патриотдешла шайчибси хIянчи дурабуркIнилис ва СВО-ла бутIакьянчибас кумек бурхьнилис 136 ибил гвардейская мотострелковая бригадала шайзибад бархьибси Баркаллала кагъарра леб.
Загьраула Кьурбанова ва АметеркIмахьила культурала Юртлизир рузуси Гульжагьан Муъминова гьаман чебаэс вирар культурала управлениелизир фестивальти, шадлихъуни, байрумти дурадуркIуси замана, ЦIудхъурла адамтани халаси устадешличил дирути ваяхIра, миллатла дуббатунира гьаладихьили. Чулира далдуцунала бутIакьянчибази «устадешла дарсра» чебиахъули бирар, секьяйдали дирутил илди жагати ваяхI: балала гьимиртазирад душути журабти, гулбазирад дирути кьапIни, пухьла гимазирад дершибти кIунби, жакетуни ва цархIилтира халкьлис гIямрулизир манпагIятдирути ваяхI. Загьрауланира устадешличил къугъати ваяхI дершес балули сари.
Ралгунси, малхIямси, гIяхIти хIял-тIабигIятла, халкьла ургаб халаси хIурмат сархибси хьунул адам сари ил. Загьраулани сунела гIямрула вархкья ТIа­гьирличил гIяхIси бяркъра бедили, багьудира касахъили, хIябал дурхIя абикьурли, гIямрула гьунчи дураиб.
Ца рурси АметеркIмахьила школализир бехI­би­хьудла классунала бучIантас дурсри кадирхьули рузули сари.
Загьраула гIямрула вархкьяра АметеркIмахьила шила культурала Юртлизив узусири, амма 2023 ибил дуслизив жявли гIямрулизивад арякьун, бунагь-хатIа урдуцаб сунела.
Загьраула Кьурбановала бузери пачалихълира кьиматлабарили, чумал ХIурматла Грамотабачил шабагъатларарили сари.
ХIурматла Загьраулас гIяхIси арадешра биубли, гIямрулизир ва бузерилизир сархибдешунира, сунела дигутани разирирули хIерриэс кьадарбиубли дигулра!