ХIушанира балуливан, Украинала мер-мусаличиб нушала улкали дурабуркIуси дявила хасси балбуц таманбиубли ахIен.
Россияла Президент Владимир Путинни бурибсири: «Гьанна дявила хасси балбуц бетурхуси замана нушала бургъантани, солдатунани ва офицертани, саби гIяхIъулали илизир бутIакьяндеш дарес арбякьунтани, илар адамдешла черяхIти къиликъуни дакIудирули сари, цали ца уцахъули, узби тяхIярли цабалги вяшбикIули. Илди даршути адамти берцахъес, нушала биштIатас ва илдала акIубтас бекIла чедиб даршуси зак биахъес, улкала хъархIерагардеш батахъес багьандан бургъули саби». Илала гъай хIясибли, нушала улкала халкьла ВатIайчи дигиличила бурули саби.
Илкьяйдали нушала цаванзалантанира дявила хасси балбуц бетурхуси мерличир гьарли-марти гъабзадеш чедиахъули сари, чула хала дудешунала гьуни илдани асилдешличил даимбирули биънилисра бикьридеш дирули. Илдазивад гьарилли улка балтахънилизи белгиси пай кабирхьули саби, нушала ВатIайс мардешла хIяланира гьаргдирули.
Нушала биштIаси ЧIишилила шилизибадра бахъал леб дявила хасси балбуцлизир бутIакьяндеш дарес арбякьунти. Илдала лугIилизивадси Айдамирличила бурес дигулра наб ишаб.
Айдамир ГIяннаев акIубси сай Ставропольла крайла Новоселицкий районна Чернолесское шилизив, 1981 ибил дусла майла 21-личив.
Айдамирли ФСБ-ла дазуличирти гIяскуртазиб къуллукъбирулри. Ил дявила хасси балбуц бехIбихьибти цаибти бурхIначивадал илав сай. Украинала миллатчибачи къаршиси ца дергълизив ил вяхъиб. Илала гIергъи госпитальлизив калун. Сагъвиубмад Айдамир сунела дявилати къуллукъуни тамандирес даимвиуб.
Ил Брянскла областьлизиври. Украинали Курскла областьлизир хIиллаби, дявила анцIбукьуни дехIдихьиб. Миллатчиби дазуличирти мер-мусаличи бухIнаберхур. Илдас къаршидеш дарес ва цIакьани имцIадарес багьандан, Айдамир левси подразделениера ила бархьибсири. ИлхIели нушала бургъанти илдала позициябачи чебухъун. Чула гьала тIашдатурти мурадуни детерхахъурли ва хъарбаркьуни тамандарили, илдала хIярхIуби адерхур. ХIярхIуби касес багьандан илди чула позициябачи чарбулхъулри. ИлхIелири миллатчибала ламартла хIярхIяли Айдамир декIли вяхъибси ва илав алхунси. Сунечил бархти бургъантани ил савхиб.
Айдамир Дахадаевла районна ЧIишилила шилизи хIяриихьиб.
Айдамиргъунти бургъантани нушази чебиахъули саби мурул адам, хаслира – дубурлан, сегъуна виэс гIягIнисил. Илдигъунти мисалти дахъал дурес вирар. Ашкарси саби, нушала бургъантани илдигъунти черяхIти гъабзадешчерти баркьудлуми чедиахънира.
Рабадан БяхIяммадов
