ДурхIядеш бегI­лара жагати, бегI­лара разити, селалра пик­­ри-шишимти агар­ти гIямру ла манзил са­би. Амма, цаца­дехI анцI­бу­кьуназиб биш­тIати дурхIнас жявли дур­хIя­деш­лизибад бул­­хъес чевкъули саби. ХIякьи­кьат­­лизиб илди декIар-де­кIар­ти сабабтачи бяхIигули бирар.

Убла, Совет хIукуматла ман­­­зилличи хIердизахIелли, Че­­бяхIси ВатIан багьанданси дергъ­ли даршуси бузерили­зи ахъибти халкьла кьисмат бу­ун. ИтхIели дурхIнала дур­хIя­деш­ра къябдердиб. Со­ветский Союз бурцис ибси пикриличил, гьа­нагарли душман чевхъун. Нушала халкь ЧебяхIси ВатIа хъар­хIе­ра­гардеш батахъес душмайчил къаршили дурабухъун. Шимазиб хьунул адамти ва биштIати дурхIни сабри калунти. ЧебяхIси ВатIа дергъ бехIбихьибхIели, Муъминат Рабазанова 10 дус риублири. Илини сунела зилантачил рарх дергъла лерилра къияндешуни чекасиб. Гьарил дурхIяли халаси, игитси баркьуди чебиахъусири. ЧебакIибси урехиличи ва гашиличи хIерхIеили, бучIра бучIули, авлахъуначиб халаси къияйчил бузра бузули, гIярмиялизи посылкабира дашахъули, чедибдеш гъамбиахъес къайгъилизибри илди.
Рабазанова Муъминат КьицIадаевна акIубси сари 1931 ибил дуслизир Сергокъалала районна УбяхI МулебкIила шилизир. Илини шила школала верхIел класс тамандариб. 1949 ибил дуслизир сунела шан ХIясан Рабазановлис шери рякьун. Илдала 10 дурхIя акIуб: кIел урши ва гехIел рурси. Илини риштIахIейчирад дахъал колхозла хIянчи дарибти сари. КIинайс дурхIни абикьесра халаси къиян кабихьиб. КIел уршили Рабазай ва Казимбекли чебяхIси даражала багьуди касиб, цархIилтани — ургабси даражала хасси. Рабазан Рабазанов машгьурси хирург, Сергокъалала районна больницала хIурматла тухтур сай. Ил хIевалуси адам хIергар или гьанбиркули саби Дагъистайзив. Илала урши Шамил Рабазанов ВЭТК-ла руководительли узули сай. Поэт, писатель Казимбек Рабазановли политехнический институт таманбариб. Ил 27 дус Сергокъалала районна мелиоративный управлениела начальникли узу­ли калун. ПатIимат районнизир рурибси палтарла уста сари. Зугьра, Таибат ва ГIяйшат Дагъиста декIар-декIарти шагьуртазиб хIербирули саби. Муъминат Рабазановала дурхI­нала ва илдала баркьибта­ла лугIи 60-йчи абиркули са­би. БусягIятла замана ил риш­тIа­си­гъуна рурси Таибат­личир Мя­хIяч­къалализир хIер­ри­рули сари.
ЧебяхIси ВатIа ­дергълизи мурул адамти арбашнили, хIян­чи­зарти биули ахIенри. Ил багьандан хьунул адамтачил барх дурхIнира бузутири. Душмайс къаршидеш дарес сурсатуни ва цIакьани хIяжатлири. ХIил­лакар душман гIелавяхI дянгаили, чедибдеш сархнилизи шимазиб калунти хьунул адамтани ва дурхIнани мекелли халаси пай кабихьибсири. ХIунтIена ГIярмия гьарра шайчибад гIеббуцес багьандан, илди бамсриагарли, дуги-хIери хIеили, кол­хозла хIян­чи­ли­чиб­ бузутири.
Ил дебали кьяркьси дергъла тарих нушала хала бегIтала хIи­­­ли белкIунси саби. Дергъла май­­­­дайчир, нушала халкьл­и да­­­­­кIудирути игитдешличил къяй­ли, тылла зяхIматчибанира халати­ гьу­­­нарти чедиахъутири. Илдани саб­ри гIярмия арцличил, дявила гIягI­ни­ахъ­лу­мачил, берк-бержла масаначил, пал­тар-кьяшличил гIеббурцуси. Ил­дала ку­мек­ли­чибли гIярмияла цIакь им­цIа­би­­кIулри. Бур­­гъантала уркIбази душма гIяс­курти па­­лакатдирехIе ибси умут хьура­биуб­си­ри. Илкьяйда бетра бетаурсири. Гьала­ди­зурти къияндешуначи хIерхIеили, сен­­нира нушала халкьлис чедибдеш сархес им­кан­бакIиб. Сепайда, дергъла бу­­­­­тIа­кьян­чиби бархIиличи-бархIи кам­би­­кIу­­­­ли саби. ИшбархIи калунти, ит кахси дергъла бикьрумили бетаурти, итхIелла дурхI­­­ни саби.
Тылла ва бузерила ветерантазирадли ца сари Муъминат Рабазановара. Илис гьалабван «Тылла ветеран» би­кIу­си документ бедили саби. Илгъуна рази­си анцIбукьличил ва чесабиуси лебил ду­нъя­ла хьунул адамтала байрамличил барх­басахъи, ил нушала шайзирад­ра уркIи-уркIиларад мубаракрирехIе. Къаркъаван чIумаси арадеш, даршудеш ва Кавказличи хасти духъянти гIямру дулгулра. БекIла чедиб ванаси БерхIи ухули, дурхIнала ва илдала баркьибтала дигили алавруцили, шадли гIямру деркIаби, Муъми-аба!
Макьалализиб гьалабихьибси наз­мура Казимбек Рабазановли сунела нешлис багъишлабарибси саби.