Дагъистан РИА-лизиб ябнала спортла федерацияла хIян­чи­зартачил пресс-конфе­рен­ция бетерхур. Бара гьалабван ил ор­га­ни­зацияли пачалихъла аккредитация ка­сиб­си саби. Федерациялис бекIдеш­дируси биз­несмен, меценат Зубай МяхIям­ма­довли иличила буриб: «Дагъистан мурталра багьа­дуртачил, гъабзадешчебти урчила мур­дабачил машгьурси бирусири. Яб­нани адамтала гIямрулизиб хасси мер бур­­цусири. Нушала организацияла мурад саби, гьалабла хIурмат-кьимат чарбарес ва ябнала спорт гьалабяхI арбукес».

Ябнала федерацияла вице-президент, лебил Россияла урчи адилкьнила гIилмула-хIялумцIнила институтла регионна вакил ГIяйшат ГIялиевани хIянчиличила тIинтIли буриб: «Нушала пикри саби ябнала спорт гьалабяхI башахъес декIар-декIарти журабазиб: конкурс, хIябдехI абзани гъудурли дурадуркIули. Илкьяйдали гьарахъти дистанциябачи урчи дуцIдирни – ил журализир арцла шабагъатуни имцIали дирар. Нушала пикри саби миллатла гIядатуначи чардухъесра – дуцIдарибти ябначир ургиби иргьни, гIяхIгъубзнала гьунарти, цархIилти хIязани дирни ва ил спортла жураличи жагьилти битIакIесра кьас саби. Иличи че нушала цагьатIи пикри леб «иппотерапия» акIахъес зягIипти биштIатас кумеклис. Ил саби нервабала изайзи бикибти, яра кьаркьа цархIилти нукьсандешуни сагъдирнила жура. Илдигъунти дурхIни, хIейгеси биалра, бахъал саби ва ябнала кумекличил илдала арадеш къулайбирниличи бирхауди леб нушала ва дурала улкнала устадеш пик­рилизи касахIелли».
Ябнала спортла федерация илкьяйдали миллатунала спортлизибра гьалабяхI арбукес кьас саби. Ил шайчибси хIянчи къелгIеббикули сай вице-президент Жамал Махтибековли. «ИшбархIи Россиялизиб тентпеггинг бикIуси журала ябнала спорт дебали гьалабяхI арбякьи саби – ил ябначир дирути ярагъличилти гьунарти сари. Нушала ишаб машгьурти гIяхIгъубзнира леб. ГIергъити авал дусла бухIнаб ябначиб мурдали ургибазибад иртнила журала даража ахъбиахъес ва гьалабяхI арбукес къайгъилизирра. Нушала командали улкализир детурхути абзаначир бутIакьяндеш дирули саби. Илдигъунти спортла жураби гIердуцахъес жагьилтачи дугьаизес дигулра».
Пресс-конференциялизир бутIакьян­деш дариб федерацияла президент Шарип Муриловлира. Илини бурни хIясибли, федерацияла цагьатIи шали ябнала туризма саби. «Ил журала спорт Дагъистайзиб жагьилси саби или бурес вирар, сенкIун ахъти дубуртачиб хIербирути имцIати адамтани саби-бегIти урчи туристунас гьаладирхьули сари. Амма илдала урчи дяркъес устадеш агара, хIебяркъурси урчиличи гьарил турис­т­ра катес хIейрар. Ил шайчиб федерацияли кумекбарес бирар устадешчебти ябнала инструкторти хIядурбарили», — викIи ил.
Дагъистайзир дахъал урчи лерли хьалли, илди гьарилла чула хозяйствобазир сари. Спортла абзаназир бутIакьяндеш ди­­ранти жура ахалтикила ябнала жинсла са­ри, илди нушала барсбикIуси тIаби­гIят­личира гIяхIил далдикили дирар. Ишаб бу­рес гIягIнибиркур, гьар дурадуркIути аб­за­начир бутIакьяндеш дирути Дагъиста ко­ман­­дала ябнани жура-журала номинациябазир мурталра гьаларти мерани сархути сари.
Ахирличиб гъайбухъунтани илар бу­тIа­кьяндеш дарибти журналистунала суалтас жавабти дедиб.