Гьарил адам сунела гIямрулизив гьачамалра бехIемцIлизи яра урехила аги-кьяйдализи викибси ургар гьунчив. Пикриухъалли, гьундурачир кадикибти бехIемцIунани чум адамла гIямру къябдердили, чумла арадеш нукьсанбушили. Илдас сабабли бетарули саби гьундурачир хасти тяхIяр-кьяйда хIедузахъни.

Мисаллис касалли, къалабахIейкIули, низам хIебуи жагали вашалра, заманаличив виуси сай пулан мерличи. КъалабаикIули гьалаухъес гъазализи викили хьалли, 5-10 минутла жявли ваэсра асубирар. Марлира, илди ца-чумал минут багьандан илцадра кахти, бебкIаличил дархдасунти анцIбукьуни диахъес гIягIнисив?
Нушала улкализир чум дин дузахъули диалра, лерилра илдани гьундурачив хIела гIяйибличивли адам вебкIили виалли, хIуни адам кавшнилизи халбирули саби. Адам кавшни биалли, бегIлара декIси бунагь саби. Иличи че, закон хIясибли судли жавабличира витIикIуси сай.
Нушанира балуливан, Дагъистайзир гьундурала даража илцад-декIар къулайси ахIен, халаси хъярхъ­деш­личил вашес. Гьунчибад бет-садбулхънила тяхIяр-кьяйда хIедуи, вяшикIес гIягIниси саби, вегIлисра цар­хIилтасра зарал хIебиахъубли. ХIязлис ахIенгу «къа­лабати шин урхьнази кадиути ахIен» или би­кIу­тира. КъалабамадикIудая!
Гьалаухъни урехи алкIахъуси уюн саби. ЦархIилтас гьалаухъес пикрибарибси замана вегIличицунра ахIи, алавчартачира пикриулхъес гIягIниси саби. Нушанира чебиуливан, гIергъиси замана, гьундурачир кункти ва дех бихути машинаби, автобусуни, камазуни дахъдаили сари. Илдала дахъдешли гьундурачир цакамси заманалис тIашдилзули (пробка), гьаларти машинаби датдихьайчи гIеларти машинаби тIамали диркьахъули сари. Адамтала сабурагардешличи ну дебали тамашарирулра. Нунира чебиули, гьундурачир машинаби арцурси урги кьяйдали дашули сари. Кункти машинаби кьалли дуэс, адамтани бицIибси маршрутка биаб, автобус биаб къалабали дашнила тяхIяр наб сеналра гIяхIбилзули ахIен. Ну чуйнара къарширикибсира хъули ретаишара, ретхIераили ребкIишара, ибти пикрумази гIеларикибси анцIбукьличил. Шофёртани чула гIямрулисцунра ахIи, пассажиртасра урехи алкIахъули саби. Илдигъунти автоманашинабала шофёртас, къалабали башес ва урехилати уюнта биркьес сеналра асухIебирар. Илдас чузи гъайилира дигахъули ахIен.
Нуни хIясиббирули, машинаби-ургаб сегъуналра гьуни хIебатурли, ибкькабизурли цалис гIергъи ца гIелабад башули саби. Багьес вируси ахIен гьунчиб се бетарарал, белики, гьалабси машина хапли тIаш­кабизес, илхIели чараагарли вайси анцIбукь ка­биркур. Лер вегIла гIяйиб агарли кадиркути бе­хIем­цIунира. Ца чидил-биалра бекIбяхъ къаршиикалли, цархIиллис гьалаухъес къайгъилизив арцурли аркьули сай, гьачам ца мерличи хIилхIи къузирули, гьачам итил мерличи. Илкьяйда гьуни чеббирхъути «игитуни» камли ахIен, чулира урехила анцIбукьуни алкIахъути. Дахъалгъунти кахти анцIбукьуни кадиркули сари авараагарси тяхIярли башнили. Илдигъунтас я заб-марка, я миъ артIни, я дирихь зяйдикIули ахIен. Машина асалли баибси ахIен кьалли, иличив вашес гьунчирти тяхIяр-кьяйдара дяркъес гIягIниси саби. Дебали урухкIеси замана саби гьанна машиналичи кайили чина-биалра укьес-вакIес.
ГьалакмадикIудая, гьундурачиб урехи хIебиахъес къайгъибиреная. ХIушала машинабачир дашухIели урехилизибад мяхIкамдеш бирахъути хIябни диршеная. ХIушачи хъалибарг ва гъамти хIерли биъниличила хъуммартидая. Чина архIяли дурадухъадаллира, арали хъули чардиабая!