Декабрьла 16-личиб Р.ХIям­за­тов­ла уличилси Мил­латла биб­лио­текализиб дураберкIибси «Челябкь­лала дар­­шу­деш» бикIуси мажлис-фестивальла бу­зе­рилизир Ахъушала районнира бутIакьяндеш дариб.

Балбуц дурабуркIнилис сиптакарси са­би РФ-ла культурала Министерство, Россия­ла культурала фонд, ДР-ла культурала Ми­нистерство ва республикала халкьла пагь­муртала Юрт.
Мажлис дураберкIнила мурад саби миллатла культура ва гIядатуни мяхIкамдарни, халкьла пагьмурти гьаладяхI дашахъес, Да­гъиста халкьани-ургарти бархбасуни уржахъни, жагьилтас адаб-хIяяла-патриот бяркъ бедни, чеалкIуси наслулизиб художественный пагьмуртачи иштяхI акIахъни.
Ахъушала районни мажлисличиб «Ди­ла гIядатуни» бикIуси дусла бегIлара гIяхI­­си­ проектла номинациялизиб чула проект гьа­лабихьиб. Иличила бурули, «Ахъу­шала район» МО-ла культурала, жа­гьил­тала поли­тикала ва туризмала управ­ле­ниела дурхI­­­­нала центрла дирек­тор Жу­мягI Мир­­зае­­вани, жагьилтачил би­руси хIян­чи­ла ва жа­мигIятличилти барх­­ба­су­нала шай­чив­си бекI­ливиубси спе­циа­лист Фатима ГIяб­дул­лаевани куль­тура­ла-бамс­ри­ихъа­хъ­ни­ла уч­реж­дение­ла хIян­чи­зар­тани халкьла гIя­да­ту­ни «ми­цIир­дир­­нила», нушаб букьур­ли баибси гIя­дат­ла­си культура мяхI­кам­бир­нила шайчиб би­­руси бузериличила ба­гьахъур. Проект бе­тур­хахъуси замана ил­кьяйдали цалабикибтази чебаахъиб Ахъушала районна туризмала имкантачила видеоролик. «Ахъуша» ансамбльли урчIемал журала мил­латла палтар гьаладихьиб ва «Усишала» делхъ дариб.
Фестивальла цаибси бархIи илкьяйдали чула пагьмурти чедаахъиб Хайдакьла, Бунакъскла, Дахадаевла, Унцукульла ва Дагъистан Республикала цархIилти районтала коллективтани.
Мажлисла программализи кадерхур халкьла устнала хIянчурбала выставкаби, устадешла дурсри, «Букьурла искусство» устахана абхьнила балбуц.
Илала бузери декабрьла 20-личи бикайчи бухъянбитIун, ва ахирличи бикахъиб халаси концертличил.
«Ахъушала район» МО-ла багьахънибала политикала шайчибси управление