МяхIячкъалализиб бара гьалабван хIулбала шала нукьсанбикибти адамти Кьуръан бучIахъес бурсибируси «ИхIсан» Центр абхьиб. Илизиб Кьуръан бучIахъес бурсибарес багьандан лерил шуртIри акIахъубли лер. Центр чумал шайчиб бузули саби: 1)Кьуръан бучIни; 2) школализирти ва исламла предметуни руркъни; 3) тифлопедагогла (хIулбала шала нукьсанбикибтачил бузути специалистуни) насихIятуни; 4) вайтIа чебиути ва хIулбала нукьсандеш лебти биштIатала бегIтас кумекбирни.

Илаб бучIес бирути саби биштIати ва халати адамти. БусягIятла замана илаб 20 адам бучIули саби, илдазибад 13 халати ва 7 биштIати. Дагъистайзибтачил барх цархIилти регионтазибадра бучIанти леб: Чечнялизивад – 1 ва Казаньнизибад – 2.
Илкьяйдали илаб акIубхIейчибад бехIбихьили, 5 дус биубти биштIатала бегIтас насихIятуни дедлугули, кумек гIеббиахъули саби. 5 дусличибад бехIбихьили, 25 дусличи бикайчи илаб бучIес имкан леб, 25 дусла чедибтас ца базла курсани сари дузути.
Центр Дагъиста муфтий шайх ГIяхIмад-апандила сипталичил аб­хьибси саби. ГIягIнидеш акIалли, лябкьуси дуслизиб илгъуна фи­лиалра абхьес чеасиб, лебилра дигути бучIахъес имкан биахъес багьандан.
Илдигъунти адамти багьудиличи бегIбарес багьандан мугIяллимти хасси багьуди касибти регионтазибадти биэс гIягIнити саби, Казаньнизибра бархли, илдазирад ца сари Центрла директор ПатIимат ХIямзатова. Илини бурни хIясибли бучIанти илаб хIербирути саби ва алхIят бархIи чула хъулрази арбашес ихтияр лебси саби. «Илдас нушани лерилра гIягIнити тяхIярла шуртIри акIахъубти сари. ДурхIнала хIулбала шала агарли биалра, илди хасти жузи хIясибли, метод Брайля бикIуси программа пайдалабарили, дурхъаси Кьуръа аятуни махраж хIясибли, дархьли дучIахъес бурсибирулра. Илала дурарад «Бусурмантала этика», «ДехIибала», «Идбагунала тарих» ва цархIилти жузира, программа хIясибли светский журала гIилмура руркъути сари. Илди бурсибирути мугIяллимти хасси багьуди касибти адамти саби. Нушала бучIанти бархIилис 4-на кьацIли балхути саби, багьуди кайснила дурабад илабти бурсибирути саби хурег бирахъес, палтар итуладирахъес, умудеш гIеббурцахъес. Илди ара-сагъти чебиути адамти-ургаб хIербирни багьандан, нушала мурад саби илди гIямрула гьарилти шалубачи бурсибарес, жамигIятлизиб цархIилтачибад саби декIархIебулхъахъес пикрили», — рикIи ПатIимат ХIямзатова газеталис ихтилат гьалабирхьухIели.
ИмцIати хIулбазиб нукьсандеш лебти адамтас ил абхьни халаси разидешли бетаур. Центр абхьнила разидеш буртIули биса гъудурси тIамаличил иларси ручIан Фатима рикIар: «Нуша дахъхIи хIертири илгъуна Центр абхьахъес ва ЧевяхIсилизи тиладидикIутири. Ил халаси талихI саби Къуръайчи къячики гьарил хIярп хахамбарес вирни. Гьанна нушанира гьарил ара-сагъси адамли кьяйда Кьуръан бяркъес дирехIе».
БучIантани уркIи-уркIилабад Муфтиятлис баркалла балахъулри халкьлис багаласи мер лебнилис ва чус илгъуна лигIмат гибнилис. ГьанбуршехIе, гьалабван илгъуна Центр вайтIа бикьутасра абхьибсири (иличила газетала цархIил номерлизиб бурехIе).
Центр «ИхIсан» МяхIячкъалала Редукторный поселокла Лаптиевла уличилси кьакьала 51 ибил юртлизиб мерлабиубли саби. ХIулбала нукьсандешличи хIерхIеили, ила гьарил дигуси дугьаизес вирар.