Даргала театрла гIяртисткани «БегIла гIяхIти гьалмагъуни» бикIуси гIяжаибти анцIбукьуначилси фильм кайснилизир бутIакьяндеш дариб.

Чидил-дигара гIяртистлис кинолизиб роль бузахъни – сунела пагьмурти белгидируси сагаси башрилизиб дебали мягIничебси ганзли бетарули саби. ХIятта фильмлизиб бузахъуси роль халаси хIебиалра, илини творчестволашал узуси адамла рухIлизир мурхьти къел гIелар далтули сари, халаси асар бирули саби.
Гъамливан, «Best friends» («БегIла гIяхIти гьалмагъуни») бикIуси халкьани-ургабси тамашала анцI­бу­кьуначилси биштIатала фильм дурабулхъан. Дарга­ла театрла гIяртистка Лейла МяхIяндгIялиевани фильм­­­лизиб сунечи хасти дахъал хIяланачил ва жи­гар­­­чердешличил дебали спортличи иштяхIсила роль бузахъули калун. ХIера, се бурибал илини набзи: «Дила игъбарбиуб «БегIла гIяхIти гьал­магъуни» бикIуси декIар-декIарти динанала вакилтили сабти хIябал юлдашличила касибси фильмла киносъемкабазир бутIакьяндеш дарес. Илала режиссер ва продюсер сайри «Чеченфильм» компанияла генеральный директор Беслан Терекбаев. Нуни МяхIячкъалализиб, ГI.ГIялиевла спортла комплекслизиб касибси фильмла бутIализир бутIакьяндеш дарира, спортлизиб бузути гIулухъабачи уркIи изусила ва илдачи кьакьарикIусила роль бузахъули. Фильмла съемкаби имцIаливан Россиялизир Чечентала Республикализир ва Индияла Республикала мер-мусаличир детурхулри. Фильм Индияла ва Россияла цахIнабси проект саби. КIелра улкала кинематографияла шайчибти специалистунани жигарчебли барх бузнила бархбасуни гьаладяхI дашахъули сари. Бурес дигулра, чули бируси хIянчилизи дахъал цIакьани кадирхьути адамти, ихтилатлизиб дебали разити, халадеш агарти сабри. Илдазивад гьарилличил тянишриъниличи дебали разилира ва фильм дурабухъниличи халаси иштяхIличил хIерлилра».
«Хъалибаргла кино дигантас разиси хабар леб – гъам­ливан «БегIла гIяхIти гьалмагъуни» бикIуси халкьани-ургабси биштIатала фильм дурабулхъан. ГIер­гъити 26 дусла бухIнаб ил Россияли ва Индияли барх касибси цаибил фильм саби. Тарихлизиб цаибси Россияла студия, суненира Болливудла «Фильм сити» павильонтазиб (кино кайсути хъулри) кино кайсули калунси – нушала «Чеченфильм» киностудия саби. Бурес чебиркур, ил Россияла Президент В.Путинни ва Ин­дияла Рес­публикала премьер-министр Наренд­ра Модини Гоа­лизиб бетерхурси БРИКС-ла цаибси сам­мит­личиб къул­­басбарибси, Россия ва Индия барх буз­ни­ла шайчиб гIям­рулизиб дураберкIибси цаибси проект саби», – ви­кIи Б.Терекбаев.
«Чеченфильм» кинокомпанияла генеральный директорли фильм касахъес кумекбарибти ЧР-ла бекI Р.Кьадировлис, РФ-ла культурала министр В.РМединскийлис, Северный Кавказла кинематография гIеббурцнила шайчибси Фондлис, «Северный Кавказла курортуни» АО-лис, Северный Кавказла къуллукъунала шайчивси РФ-ла министрла цаибил заместитель О.БайсултIановлис баркалла багьахъур.
Фильм 5 мезличил гъайбикIуси саби: урусла, чечентала, англияла, хиндила ва гIярабла.