Дубурла гьарил шилизир жяв замунтачирадал адамти декIар-декIарти устадешличи бурсибиубтири. Ца шилизир тIалхIяна дирутири, цархIиллизир – ярагъ, хIябэсиллизир хьунул адамтас хасдарибти мургьи-арцла матяхI ва цархIилтира.
Гьарил шилизир ризкьи дашахъутири ва хIяйвантира мазала масра адилкьутири. Илкьяйдали цабехIли цабехI гIеббурцули, къугъали яшав лушули буили саби дубурлантани. Илдас илкьяйдали чиналра вачарличи башес хIяжатдешра хIебурги. Лер цацадехIти шими гьаннара хала бегIтачирадли даибти устадеш, илдала культура мяхIкамдирули ва гьаладяхI дашахъниличибли машгьурбиубти. Илдигъунтазибадли саби хайдакьлантира. Хьунул адамтани чIянкIилизи къугъали някьиш делкIес балуси саби. Леб мурул адамти-ургабра пагьмучебти урца ва къаркъала устни. Илдигъунтазивадли сай ХIяйдарбек ГIяшурбековра. Илдигъунти гIяхIти устадешличил бегIбиубти адамти ункъли гIеббурцули саби республикала декIар-декIарти организациябанира. Дубурла шимазибадти илдигъунти устадешла бегIтачи имцIали пикри бяхIчииутазибадли саби республикала халкьла пагьмуртала Юртра. Илини республикала культурала центртачил миллатла культура мяхIкамбарес ва гьалабяхI арбукес багьандан белгиси хIянчи дурабуркIули саби.
Гьалабванра Дагъиста халкьанала цадешла БархIиличил бархбасахъи, «Кайтаги» бикIуси миллатла культурала центрлизибси «Кунацкая» бикIуси клубли Дагъиста декоративно-прикладное искусствола шайчир устадеш лерси ХIяйдарбек ГIяшурбековлис пагьмуртала шадлихъ дураберкIиб.
Выставкабала заллизиб ил устали дарибти ваяхIла «Пагьму ва гъира» ибси выставка дураберкIиб.
2015 ибил дусличивадли ХIяйдарбек «Кайтаги» бикIуси культурала центрлизив урцуйзи ва къаркъализи някьиш дирули уста-художникли узули сай. Илини бекIдешдирули сай «Уста» бикIуси кружоклисра. Илини дурхIни Дагъиста халкьанала устадешличил тянишбирули ва илдачи руркъули сай. ДурхIнира халаси иштяхIличил башар илала дурсрачи.
Балбуц ибхьули гъайрухъун культурала «Кайтаги» центрла директор Зубайдат ХIясанова. Илини бурни хIясибли, устала гьарил ваяхI цархIилтазибадли декIарбулхъуси ва тамашала саби. Илини хIядурдарибти къугъати някьишличилти къаркъубани жагадарили сари «Кайтаги» центрла бяхIяни. Центрла этноцентрла выставкабала заллизир илини хIядурдарибти ваяхI мурталра чедаэс вирар. Ил секIайчи центрла хIянчизартицунра ахIи, лебилра ила башутира разили саби. Дагъиста халкьла художестволати ваяхI дирнила устадеш гьаладяхI дашахъни багьандан ва республикала, лебил Россияла халкьани-ургарти халкьла пагьмуртала фестивальтачир бутIакьяндеш дирни багьандан, ХI. ГIяшурбеков дахъал грамотабачил ва дипломтачил шабагъатлаварибси сай.
ХIяйдарбекла юлдашуни, барх бузанти, культурала хIянчизарти ва ученикуни халаси иштяхIличил хIербикIи иличила чебаахъибси роликличи. Ил чебаахъиб ХIяйдарбек СягIидовичла ученик ХIусен ГIябдурашидовли. Илинира сунела учительлис уркIи-уркIиларадти баркаллала дугьби дуриб.