Гьалабра хъяр­бу­кан­тани халати гьунарти сархибти сари валкIа Тимурличил (Те­мир­лан) ва Деникинничил ка­ди­кибти дургъбазир.

Цагьа­ча­малра гIелум­хIебизурли, дяхI-дяхI­ли дурабулхъутири илди Ва­тIайс къияндикибхIели. Ил­да­ла гьунарти гьандуршули, ши­­лизир гьаннара дахъал дал­ду­­цуни дурадуркIули дирар. Ма­сала, Де­­никинничилси дяви ка­бикиб­­хIей­чирад даршал дус дикнилис хасбарибси бай­рам­­личир спортла шайчирти аб­зани дура­дер­кIиб. Илди мур­талра Хъяр­бук­лизибси «Унеу» би­кIуси дубурличир ду­ра­дур­кIу­ли дири. Иш гьакI­ли­зиб абзани дурадеркIес Из­­бербаш шагьарла пляж декIарбариб, се­на­хIенну кIуртI­бикIнила аб­занира дура­дер­кIес пик­ри­ба­рибсири. Ила бахъал гIу­лу­хъа­би, гьести гIямрула адамти, биштIати дурхIни ца­ла­бикиб.
Гьайгьайра, абзани ункъли детерхахъес, чедибикибтас савгъатуни ва грамотаби дедес пикрибариб. Илди ва цархIилти харжани ГIяйсаев ГIяйса ХIямидовичли сунечи чеасибтири. Илини мурталра гIяхIцад харжани дирули вирар шилизир дурадуркIути цар­хIилти далдуцуначир­ра. Амма иш гьакIлизир илди де­бали им­цIа­ли детаур, сена­хIенну абзаначир бутIа­кьяндеш дарес хъярбукантицунра ахIенну, цархIилти даргантира цалабикиб. Ил адамла уркIила сахаватдешли чумра халати ва биштIати разибариб.
Наб ишаб бурес дигулра, Хъярбукла ши бусягIят дацI­кадулхъути шимазибад ца саби. Гьайгьайра, дебали децIагеси анцI­букь саби ил. Амма или биалра, хъярбукантани дурабуркIуси спортла бай­рамличи Избербашлизибад, МяхIяч­къалализибад, Дербент­ли­зибад ва цархIилти шагьуртазибад, Ставропольла крайлизибад адамти учибикиб. Дигеслири нушала байрам илцадра халаси уржибдешличил бетурхни. Балбуц бузахъулри Сергей ХIяжиевли.
Ишаб наб декIар-декIарти абзаназиб чедибикибтачилара бурес дигулра.
Жимлизиб: РабаданхIяжи ГIялиев – 1-ибил мер (4000 къу­руш дедиб илис); Хасбулат ХIясайниев – 2-ибил мер (1000 къ.); Тимур Ражабов — 3-ибил мер (грамота). Армрестлинг­ли­зиб: Мурад МяхIям­ма­дов – 1-ибил мер; Айду Мя­хIям­ма­дов – 2-ибил мер. Зузвирнили­зиб: И.Закаригаев – 1-ибил мер; ГI.Мя­хIям­мадов – 2-ибил мер; Г.Жалилов – 3-ибил мер. КуртI­­бикIнилизиб: ГIябдул­лагь ГIябдуллаев – 1-ибил мер; Ислам ГIяб­дусаламов – 2-ибил мер; ГIиса ГIяб­дул­ла­ев – 3-ибил мер. Гьарахъдеш­ли­чи тIяхI­­булхънилизиб: Кь.Кьур­ба­надамов – 1-ибил мер; ХI.ХIя­сайниев – 2-ибил мер; Б.Мя­­­­­хIяммадов – 3-ибил мер. Къар­къа ир­гьнилизиб: Тимур ГIатманов — 1-ибил мер; Рашид АхIядов – 2-ибил мер; Ся­гIид Ис­мягIилов – 3-ибил мер. 200 метрличи дуцI­бикI­ни­лизиб: ГIяхIмад Кьурбанадамов – 1-ибил мер; Камил Ху­лалмяхIяммадов – 2-ибил мер; Мурад ЖабрагIилов – 3-ибил мер. 1500 метрличи дуцIбухъун гIяхIцад спортсменти. 1-ибил мер сархиб ГIябдуллагь ГIябдуллаевли, 2-ибил – 14 дус виубси Мя­хIяч­къалала 29 ибил школала учIан МяхIяммад ГIяб­дул­лаевли. Ил дила рурсила урши сайри. Дусми я битIакI хIясибли, иличил цугси левси хIейалра, ил дуцIухъун ва кIиибил мер сархес бажардиикиб. 3-ибил мер буциб Рабазан Кьурбанадамовли. Цаибти мерани касибтас 4000 къуруш дедиб, илкьяйдали дурхIнас – дипломтира.
Абзани тамандиубли гIер­гъи, байрам даимбариб ша­гьар­ла кафелизиб.
Хъярбуканти ахIенти урш­ба­нира бутIа­кьян­деш дариб илди абзаназир. ГIяй­са ХIя­ми­до­вичли илдира шабагъатлаба­риб.
Баркалла биаб абзани дурадеркIахъес халаси къайгъибарибси ГIяйса ХIямидович­лис ва гьунарти чедаахъибти хъярбукантас!