«Наб гьанбиркуливан, бургъанти…»

Халаси децIлизи викибси халкьла поэт Расул ХIямзатовли белкIунси «Къургъи» бикIуси назму лебил дунъяла адамтала уркIбазиб калун. КахIелес бирару, гьатIи, илини илцадра дархьли ва жагали чедаахъибхIели дургъбазиб бебкIибти адамтачила децI ва пикруми. Р.ХIямзатовли, къургъачил бургъанти цугбуцили, ил арцан адамтала умутла ва децIла ишараличи шурбатур. Иличил бархбасахъи, Дагъистайзиб бетерхур халкьани-ургабси «ЦIуба къургъала бурхIни» 33 ибил фестиваль, сабира ЮНЕСКО-ли гIеббуцибси. Фестиваль бетерхур сентябрьла 6-личибад 10-личи бикайчити бурхIназиб.
Балбуц абхьиб Дагъиста Правительствола Председательла Цаибил заместитель А. Карибовли Ленинна комсомолла парклизиб. Илини лебилра мубаракбариб фестиваль бехIбихьниличил.
Цалабикибтала гьалав гъайулхъули, Россияла писательтала Союзла правлениела цаибил секретарь, халкьани-ургабси премияла ва Расул ХIямзатовла уличилси премияла лауреат Геннадий Ивановли буриб, поэтла назмурти лебтанилра далули сари, илдазир адамтала уркIби мурталра пикридикIахъути кьяйдурти: ВатIан дигни, юлдашдеш ва дигай лерни багьандан. Дагъистайзир поэтла произведениеби художественный жураличи шурдалтнилис хасдарибти далдуцуни детурхули диъниличилара багьахъур.
Бурес чебиркур, «ЦIуба къургъала бурхIни» балбуц, гьарли-марли, лерилра халкьанала мягIничебси анцIбукь саби, сенахIенну поэтла творчество дебали дигахъули саби Дагъистайзибцун ахIи, илала дурабра.