Урхьназиб адамти кахIейгIяхъес багаладиэсти наси­хIятуни дурули сари шагьарлантази республикала ме­дицинала мяхIкамдеш бирнила центрла специалис­тунани.

Гьар дус урхьназив куртIикIес ихтияр лебси манзил сабаиб­хIе­ли, дахъал кахти анцIбукьуни кадиркули сари. Ишдус дуцIрум дехI­ди­хьибси манзилличирад 9 адам урхьназиб кягIили саби, илдазибад 4 — биштIати. Дербентлизив, Каспий урхьула дублаб­ юлдашуначил бамсриихъухIели урхьулизив республикала МЧС-ла хIянчизар алхи сай. Июнь базла ахирличив илкьяйда веб­кIили сай Сулахъ хIеркIличив Дагъиста спортсмен МикагIил ГIяб­дуряхIмановра. Илдигъунти анцIбукьунас сабабли бетарули саби, имцIаливан, мяхIкамдешла тяхIурти мучлахIедарили шиннизи кабулхъни. Иличибли бамсриахъни мусибатличи шурбулхъули саби. Илала дурабадли, гьавала буцIардешра ахъти температурабачи баили саби.
БубкIутала лугIи камбиахъес багьандан, ДР-ла арадеш бихI­нила Министерстволи МяхIячкъалала шагьарла пляж ахтар­ди­бариб. Республикала медицинала профилак­тикала центрла специалистуна­ни Дагъиста хабарагарли кадиркути балагь-кьадарла шайчибси медицинала центрла бригадаличил ва сту­ден­тунала «ДяхIила гъал­бецI» бикIуси отрядличил барх гьаланачиб, жа­мигIятла хьарбауд дураберкIиб кIинайс биалли халатала ва биштIатала манекента­чиб чебаахъиб секьяйда гIеббиахъусил цаибси кумек кягIибси яра буцIардешли аргъала детахъахъибси адамлис. Шиннизив кур­тIи­кIу­хIели, мяхIкамдеш дакIудирнила тяхIуртачилара тIинтIли аргъахъиб.
Гьанбиркахъулра хIушази, хIушала гIямру мяхIкам­дарес багьандан ишди тяхIурти дузахъеная. ВегIлис урехи лебти мераначир кIуртIмадикIудая: кур­тIикIа­хъес хасдарибти мераначирцун куртIдикIеная; мурхьдеш ва ур­хьула лутIила аги-кьяйда хIебалути мераначир шиннизи тIяхI­ма­дикIудая; куртIикес ихтияр барибси мерла дазула дура мадашудая; хIуша аркьуси пляж къадагъабирутазиб лебал хIеръая.
Масхаралис хIушала гIямру урехилизи мадирка­хъи­дая: къая­къу­начи, гамурбачи ва цархIилти кIуртI­дикIути секIайчи гъамма­дирудая; жура-журала белшнибачи ва къадагъала лишантачи адмадицIудая; машинала хIулала резина, духьбала белш, гечбируси кровать яра уркьули пайдаламадиридая куртIдикIес багьандан; хъуммартидая, шиннизи ухIнаиркнила, дахъхIи шинна удир калнила ва цархIилти илдачи мешути хIязани дебали урехилати сари. Къянала лишанти мадурхьидая.
БиштIатачи хIеруди биреная: илди мурталра халатала хIерудилиуб биэс гIягIнити саби. Сабицун шиннизи бухIна­бул­хъа­хъес яра бахъхIи шинна удиб буахъес ихтияр малугадая.
Берк-бержла ва куртIикIнила замана декIарбиреная: укунхIели шиннизи кавхъес асубируси ахIен, 1,5-2 сягIят дикес гIягIнити сари.
Кепдиубли шиннизи духIнамадулхъадая.
Адам кягIибхIели цаибси кумек: бегIлара гьалаб вируцад гьалакли урхьула дубла дурасес гIягIниси сай ухIнайкибси адам, ва бусягIятал 103 номерличи зянкъдяхъили, къалабаси кумек гIеб­би­ахъуси машина жибарес. МухIлила умх гъумлизибад ва шинна кьар­лизирад умубарили, вайтIадикибси адам увилчеварая, чедирти гьигьла мераначирад шин дурадикахъес багьандан (биштIати кьяшми дуцили, бекI удили ахъбурцу). Адамли гьигь дурабалтули хIейалли, ил шайчиб кумекбарес гIягIнибиркур: кягIибсила къянкъ буцая ва гьигь касили, гьава мухIлила бухIна гьигьбарая. Гьарил 4-5 секунд ил тикрарбиреная. БиштIатасра илгъуна кумекбируси саби.
Рахли уркIи тимхъ­би­кIули хIебиалли, уркIила массаж бирули дехIдирхьеная: кягIибси диркьси, чIумаси мерличи кайхьая; хъат някъби цаличи ца гъяждарили кягIибсила михъирличи кадирхьеная; газа някъби дархьдарили, лебил хIушала декIдешличил илала михъирличи гъяжбарая; ца секундцад бухъянбитIахъи гьарил гъяжбарни 30-йна барая; къияндикибси аргъайчи вакIибхIели, ил ванавиахъес гIягIниси саби: юргъайзи ласварая, ванати, мурити чяйли вахеная.
Чараагарли тухтурти бакIайчи дуэная! КягIибсила биалли, изути кьанни дагьардиэс асубируси саби.