Гъабзала хIял гъазализиб бала, бикIули бирар дубурланти. ГIергъиси замана Украинализир кадиркути дявила анцIбукьуназир бутIакьяндеш дирути нушала улкала бургъантанира гъабзадешла ва игитдешла баркьудлуми дурадуркIниличила нушани мурталра хабурти иргъулра. Иш гьакIлисра дахадаевланти разибиахъуб Дагъистан Республикала БекI Сергей Меликовла уличи бакIибси 15 ибил декIарси (отдельная) гвардияла мотострелковая Александрийская бригадала командир, гвардияла подполковник Андрей Буйловла Баркаллала кагъарли. ХIера, се лукIулил илини: «Дагъистаннизивадси старший лейтенант МяхIяммад ГIяхIмадовли СВО-лизир цаибти бурхIначирадал бутIакьяндеш дирули сай. Душмайчи къаршили игитдешличил ургъуси илини сай умутчевси ва марси юлдаш сайливан цархIилти бургъантас гIибратли ветаурли сай…» 

ИшбархIи Дахадаевла районна КIишала шилизивадси гIяхIгъабза урши управлениела ва дявила гIягIниахълумачил гIеббурцнила ротала командир сай ва ЛНР-лизиб къуллукъбирули сай. Чуйнара дяхъи-хъаслизи викили виалра, ил къуллукъбирес даимиубли сай ва сунела дявила юлдашуни бархьбатес дигули ахIен. 

МяхIяммад ГIяхIмадовли МяхIячкъала шагьарлизибси НурмяхIяммад ХIяжимяхIяммадовла уличилси 42 ибил школализиб урга даражала багьуди касибсири. Илала гьала сегъуна санигIят чеббиркIуси ибси масъала тIашхIебизур. Илини ункъли балулри сунела дудешла санигIят даимбарес хIяжатли биъниличила. МВД-ла хIянчизар, капитан (2022 ибил дуслизив нушачивадли даимлис арякьунси) сунела уршилис мисалли вирусири мурталра.

МяхIяммад Новосибирскла дявила чебяхIси командное училищелизи керхурсири ва илаб ункъли белчIуди хъараахъурсири. УчIухIелира бухъя-зегъализив ва хъарбаркьуни заманаличир тамандирнилизив декIарулхъусири. Спортлизивра гьалавяхI вашусири. Някъ-някъли вирхIнила шайчир чемпионатуначир чуйнара цаибти мерани дуцибтири. 

БелчIуди хъараахъурли гIергъи Оренбургла областьла Тоцкое — 2 бикIуси шилизи вархьибсири. Украинализир дявила анцIбукьуни дехIдихьибхIели ЛНР-лизибси 15 ибил  декIарси гвардияла мотострелковая Александрийская бригадализиб къуллукъбарахъес вархьибсири. 

МяхIяммад ГIяхIмадов шабагъатлаварибси сай Жуковла ва «Дявила асилдеш багьандан» бикIути медальтачил. Дубурлан урши цархIилти шабагъатуначира гьалаихьибси сай. 

МяхIяммадгъунти Дагъистанна асилти уршби дергъла майдайчиб цархIилтас гIибратли бетаурли саби ва илдачи нушани пахрубирехIе. Нуша дирхулра нушала гIяхIгъабза бургъантала игитдешличи ва ВатIан батахъес багьандан илдани гьунарти чедиахъниличи. Илдигъунти залумти бургъантани гъамси манзиллизиб чедибдешра сархниличи умутчерлира.