Ишди бурхIназиб Сергокъалала районна дявила комиссариатлизиб сакIубдеш саби – жагьилти Россияла гIярмияла къяянази бурхьнила хIяракат даимбиубли саби.
Цаибси кьукьялизи каберхурти урегал жагьил адам ВатIа гьалабси чебла ахъес арбякьун. Мурталраван, ил бархIи гIярмиялизи вархьес тIалабвируси къатIлизир шадлихъла аги-кьяйда кадизурлири. Амма гIярмицуни ва илдала бегIти кьакьабикIни багьеслири.
Жагьилти гIярмиялизи бурхьнила шайчибси балбуц абхьиб Сергокъалала ва Ахъушала районтала дявила комиссар Шамиль Чупалаевли.
Сергокъалала районна дявила комиссарли узули калунси, халатала, дергъла ва бузерила ветерантала Советла председатель МяхIяммадсалам МяхIяммадов жагьилтачи насихIятла дугьбачил дугьаизур.
Районна бекI МяхIяммад ГIямаровла шайзибад илала заместитель Баркакьади Мажидовли жагьилтас гьарбизуни далгун. Ил бархIи дявила комиссариатлизир делхъ-далайла агурби зайдикIулри, жагьилти чула гъамтачил делхъличи кабухъун.
