БусягIятла замана жа­мигIят, бизнес ва хIукумат дарх дуз­ни­ла гьаргси майданни бе­таур даг МяхIячкъалализиб гьарг­биубси Северный Кав­каз­ла федеральный округла «Со­об­щес­тво» бикIуси жигарчебти адам­тала мажлис.

“Бузерила эко­номика. Бузерила мерани. ХIян­чиличил гIеббуцни” иб­си тема сабри иличиб гьарг­ба­риб­сира.
Ил бетурхуси саби 2015 ибил дусличибад, Россияла Федерацияла ЖамигIятла палатала икьайчил. Мажлис регионтазир лерти масъулти пикридарес ва илди арзести тяхIурти белгидарес, илкьяйдали жигарчебти адамтала асарчебси бузерила устадеш гIерасес кумекли бетаурли саби.
ХIера, иш яргализирра кIел бархIила мажлисла бузерилизир гIяхIцад далдуцуни дурадеркIес имканбакIиб – ихтилатуни, багьудила устадешла дурсри, гьунибаъниби, мягIничерти проектуни гьаладихьни. БутIакьянчибани социальный баркьудила предпринимательство гьалабяхI башахънила сагати тяхIяр-кьяйдаличилара багьур.
Пленарное заседаниела бу­зерилизир бутIакьяндеш да­риб Дагъиста БекI Владимир Васильевлира. Илини хас­лира пикри бяхIчиаиб мер­личир продуктуни дурайъ­ни­ла масъалаличи. Илала гъай хIясибли, ил багьала-ба­гь­ла­ли дяхIцIилиубад дураили, гьа­лабяхI башахъес ва сагабарес гIягIнили саби или багьахъур.
ДР-ла БекIли илкьяйдали гIяхIцад масъулти гьандушиб, гьарил кьялилизир кадикибти дарсдешуначилара багьахъур, ил шайчиб гьаннала гIергъира хIянчи даимдарили дирниличира цалабикибтала пикри бяхIчиаахъиб.
Илкьяйдали, мажлисла дазурбазиб, РФ-ла ЖамигIятла палатала физическая культура­ла ва арати гIямру дуркIнила хIя­ракат тIинтIбирнила шайчибси комиссияла членти ва экс­пертуни спортла чумал шко­лализира бякьун. ГIяхIли илар акIахъубти шуртIрачил тя­нишбиуб.
Буралли, регионна кьад­рила илдигъунти далдуцуни нушала республикала эко­но­микализиб-социальный бяхI­чибизлизиб гьалабяхI башнилис гьаликIлира детарули сари.
Балбуцла ахирласи са­бухъ­ли детарар ишдусла ахир­­личиб Москвализиб ду­ра­­буркIуси, баянти кайуси мажлисличи пикруми-кьасани гьаладихьни.