Хайдакьла районнизиб Россияла Ярагъладарибти ЦIакьаназиб къуллукъбарахъес жибирнила хIяракат бетурхули саби. Апрельла цаличиб бехIбихьибси ил июльла 15-личи бикайчи бетурхуси саби.
Апрельла 3-личиб дявила комиссариатлизиб, ГI.Темирбулатовла бекIдешлиуб, ил шайчибси цаибси заседание бетерхур. ДурадеркIес хIяжатти далдуцунала план цалабяхъиб. Шимала бургачи ва низам-кьяйда далтахъути органтала хIянчизартачи гIярмиялизи жибарибти заманаличиб военкоматунази башахъес ва илдачил хIянчи дурадуркIахъес хъарбариб.
Хайдакьла ва Дахадаевла районтала дявила комиссар ГI.СягIидовли Россияла гIярмиялизиб къуллукъбарахъес гьанна жибирутала лугIи 110-личиб имцIали бирар илира буриб. Илди саби 18-личибад 27-личи бикайчити дусмала дурхIни.
Сагати регионти хIисабхIедарили, Россияла ванзурбачирти мераначирти дявила частанази буртIути саби илди ва хасси балбуцлизир бутIакьяндеш дарахъес бурхьути ахIен илира цIакьбарили буриб.
Районнизибси комиссариатлизиб илкьяйдали бузули саби медицинала шайчибси комиссияра. Ила бакIибти дурхIни тухтуртани ахтардибирути саби ва гIярмиялизиб къуллукъбарес асубирусил ахIенал белгибируси саби.
Апрельла 17-личиб районнизибад гIярмицунала цаэсил кьукья бурхьуси саби.
Хайдакьла районна администрацияла
пресс-служба
