Дубурланти чула гъабзадешличил ва уржибдешличил мурталра декIарбулхъути саби. Илдала къяяназиб даргала миллатра дусмадли гьарил бетуцлизиб гьалаб бируси саби. Илди-ургаб хIялалдешличибли, гьунарти сархниличибли ва сахаватдешличибли ва цархIилти черяхIти баркьудлуми сархниличибли декIарбулхъутира камли ахIен. ХIера, илдигъунтазивадли цаибтала къяяназив сай Ахъушала районна Бутрила шилизивадси Мусилов Мусил МяхIяммадовичра.

2006-ибил дусличирадли илини ДР-ла МЭС-ла (медико-социальная экспертизала) БекIлибиубсигъуна бюрола Къоркъмаскъалала шилизибси филиаллис бекIдеш дирули сай. Ил 2007-ибил дуслизив ДР-ла Халкьла Соб­раниела депутат Перзият БяхIяндовала кумекчилира калунсири.
М.Мусилов тухтуртала хъалибарглизивадси сай. ДГМА-лизиб белчIуди хъараахъурли гIергъи, илини Санкт-Петербурглизир интернатура ва аспирантура таманаибтири. Дубурлан уршили хирург-экспертла санигIят касибсири.
М.Мусиловла дудеш МяхIяммад Мусилов Буйнакъскла районнизив тухтурли узули калунси сай. 1987 ибил дуслизив ил Дагъистанни адамти социальный бяхIчибизлизиб гIеббурцнила шайчивси министрла заместительли катурсири.
УркIи-хIял гIяхIти адамти медицинализиб бузни бахъла игъбар­лизи халбарес вирар. Илди адамтала гIямру бебкIала кьялшу­ба­зи­радли дерцахъес къайгъилизиб саби. Илдигъунти адамтани ме­ди­ци­нала бетуцлизирцун халкьлис гIяхIдешуни дирули буули ахIен. Илди чебетиули саби адамтала яшавла даража ункъбирахънила, культура гьалабяхI башахънила ва рухIлашалти бетуцуни гIер­дурц­нила шалубачира. Даргантала балгундешла, уржибдешла ва са­хаватдешла асар саби ил дубурланнизи нешла ниъличил барх ми­на­биубси.
ХIера, Мусил Мусиловли даргала рухIласи давлали бетаурси «Замана» газета гIеббуцести имкантира даргиб. Илдигъунти гIяхIбаркьуни дурадуркIути багьадуртас баркалла бикIес хIебумсар даргантира. ГIурра адамтас гIяхIбаркьуни дурадуркIахъес арадешра талихIра хIела гIямрула даимти дархкьябили диаб, хIурматла Мусил МяхIяммадович!