Дахадаевла районна Кубачила шилизиб балбуц дураберкIиб. Кубачила мургьи-арцла устни ва культурала хIянчизарти ГIялибег Куртаевла ва ХIяжимяхIяммад ГIялихановла устаханабази гьаббакIиб. Мургьи-арцла уста-дизайнер ГIялибег Куртаев акIубси сай 1971 ибил дуслизив, Кубачила шилизив. Ил минала мургьи-арцла устнала хъалибарглизивадси сай. ГIялибегла хала бегIти мургьи-арцла ваяхI далкьарахъути лерилра санигIятуначи бегIбиубтири. ГIялибег пагьмучебти адамтала ургав хIерирули ва сайра жагати ваяхI дирес бурсивиубли сай. Дурхъаси мегьлизирадли ваяхI дирнила устадеш ункъли дяркъурси илини сегъунти-дигара журала гIягIниахълуми дирули сай.
Кубачила устни бурсибиубти саби бегIлара къиянти тяхIурти дузахъес. Илцадра чедетаахъили ва жагали дирути илдала гIягIниахълумани адам тамашавирахъули сай. Чула устадешла бетуцуни илкьяйдали гьаладяхI дашахъули ва чеахъдикIахъули бамсриагарси бузерилизи ахъибти саби кубачиланти. Илдани чумал санигIят дузахъули сари викIалра, хатIа бетхIерар. Илдани урцуйзирадли, лигубазирадли ва къаркъубазирадли ваяхI дирнила, филигрань ва эмаль пайдаладирнила устадешра гIяхIил дяркъурли сари. Илдигъунти бетуцуни пайдаладарили хIядурдирути сари мургьи-арцла ваяхI. Ца гIягIниахъала бирухIели, чумал устали бутIакьяндеш дирули бирар.
Мургьи-арцла устнани някьиш дирнила ва кулхми дирнила устадеш чедаахъиб гьалабван дураберкIибси балбуцличир. ХIяжимяхIяммад ГIялихановли илхIели чула устадешла дигIяндешуначила баянти гьаладихьиб. Илини бурулри мургьи-арцла устала санигIят гьарил адамли бузахъес вирар или. «ИшхIелла манзиллизиб Интернетла кумекличил бурсибирутира камли ахIен. Практикализир гьарил секIал пайдаладирес хIяжатти сари. Гьайгьай, творчестволашалра устадеш диэс гIягIнити сари», — викIи ил.
