Ражабова ХIялимат ГIялиевна акIубси са­ри ТIантIала шилизир, хала­си, хIур­матла хъалибарглизир. ТIан­тIа­ла ши­лизибси урга даражала школа гIяхIти кьи­ма­ту­начил та­ман­­­барили гIергъи, ил Дагъис­танна куль­турала ва искус­ство­ла кол­леджлизи ка­рер­хур, ва илини илра гIяхIти кьиматуначил хъа­ра­ахъур.
ГIур ХIялимат Бутрила шилизи шери рякьун.

2004-ибил дуслизиб школализир хореографияла дурсри кадирхьули, дурхIни делхъличи бурсибирули, сунела бузерила гьуни бехIбихьиб. Пагьмучерси, жавабкарси, сунечи хъарси хIянчи чебетаахъили бекIбируси ХIялимат 2011 ибил дусличирад Бутрила шилизибси Россияла халкьла культурала Центрла художественный руководительли рузули сари.
ХIялиматли культурала управлениела гIямрулизир жигарла бутIакьяндеш диру, культура гьалабяхI арбукес багьандан, халаси къайгъи бирули сари. Районна духIнар ва илала дурар детурхути республикала кьадрила фестивальтачир, конкурсуначир, байрумтачир ва цархIилтира фольклорла шадлихъуначир илини миллатла палтарра чегьурли, жагали делхъ диру, миллатла дуббатуни гьаладирхьу, дурхIнази гьалабла манзилла гIядатуни хъумхIертахъес бажардилизир рирар.
Сунела гIямрула вархкья ХIябибличил барх ХIялиматли хIябал дурхIя абикьур, илдас гIяхIси бяркъ бедиб, чебяхIси даражала багьуди каса­хъиб, ва гIямрула дякьличи дураиб. Сабигъунти хIурмат-хатир дарес балутили абикьур.
ХIялимат Дагъистанна культурала Министерствола, «Ахъушала район» МО-ла администрацияла, культурала ва туризмала управлениела шайзирад чумал ХIурматла Грамотабачил шабагъатларарили сари.
ХIялимат Бутрила шилизибси культурала Юртла директор Зубайдат ГIялиевачил ва ил шила библиотекарь ПатIимат ИсмягIиловачил рарх лерилра дурадуркIути шадлихъуначир чераэс вирар. Илди хIябалра пагьмучебти, малхIямти культурала хIянчизарти саби. Саби-ургабра дебали балгунти, чина аркьули биаллира, барх башути, илди цархIилтасра гIибратлис бурести саби.
Бутрила шилизирси пагьмучерси лукIан ЖумягI ХIяжигIялие­ва­чил­ра бархбас леб илдала. Илисра ил­дани кумекбирули бирар.
Чула гIямрулизир арадеш, бузерилизир сархибдешуни, гьаннала гIергъира цалис ца хIялалли, марли гьалмагъдеш дирули хIербиэс кьадарбиаб!