31 дус виубси ГIябдурашид ГIялиевли сунела жагьти гIямруличи хIерхIеили, кIел дявилизир жигарла бутIакьяндеш дарили сари: 2020-ибил дусла октябрьличирад 2021 ибил дусла апрельличи бикайчи Сирияла-ГIярабунала Республикализиб дурабуркIуси хасси балбуцлизир ва 2022 ибил дусла февральличибад бусягIятла заманаличи бикайчи — Украинализиб дурабуркIуси дявила хасси балбуцлизир.
Декабрьла 13-личиб «Елдаш» газетала редакциялизив ГIябдурашид ГIялиев журналистуначил гьуниваиб, ва ДНР-ла ва ЛНР-ла мер-мусаличир сунела дявилати къуллукъуни секьяйда ихъибал буриб.
Илала гъай хIясибли, гьала-гьала къияннири, сенкIун сапертас хIянчи дебали дахъалри.
«Нушани дявилати мер-муса минабазирад умудирнила дурарад, халкь хIербирути хъулрира дархли умудирулри, сенкIун миллатчиби гIелабяхIбиубхIели, хъулразир минаби кадирхьулри, хъа бегIти ила чархIебиахъес багьандан. Минаби кадирхьулри дахъал хъулрала юртанала подъездунази, гIинзурбази ва цархIилти мераначи», — викIи командир.
Буйнакъскла районна Нижнее Казанищелизив халаваибси ГIябдурашидли 2013 ибил дуслизиб Южно-Россияла пачалихъла технический университет таманаибси саби. Дявила багьуди илини касиб ЮРГТУ-ла гьалабси дявила кафедрализиб ва «Лейтенант запаса» ибси звание сархиб.
Дявиласи чебла ихъули, гъабзадешличил декIарухъни багьандан, РФ-ла Президентла 2022 ибил дусла сентябрьла 22-личибадси ХIукму хIясибли ГIябдурашид ГIялиев Гъабзадешла орденничил шабагъатлаварибси сай.
Ведомстволати шабагъатунира лер илала: «Дявилизив декIарухънила» медаль, РФ-ла оборонала Министерствола ХIурматла Грамота, дергъла ветеран.
