Ишди бурхIназиб даргалацунра ахIи, Дагъистанна лерилра миллатунала вакилти лебгIеб разибиэси анцIбукь кабикиб. Республикализив бегI гьалав халкьла писательла уличи лайикьикибси пагьмучебти лукIантазивадли цаибтала къяяназивси хабарла ГIяхIмадхан Абу-Бакарличила баянтачилси, дебали жагаси жуз урус мезличил дурабухъун. Илгъуна гIяхIбаркь дураберкIес пикрибарибси ва сунела харжаначил жуз дураибси Перзият Кьурбановна БяхIяндовас баркалла балахъули, илис дахъал талихIчерти дусми, къаркъагъуна арадеш, хъулиб баракат, сунела гъамти-тухумтас талихI дулгехIе.

Дубурлантала гIядат лебси саби дурхIя акIубси хъалибаргличи талихIчебти бегIти мубаракбарес или илдала гъамти, тухумти, шанти цалабиркнила. ИшбархIи даргала миллатла къугъаси авидлизиб рухIласи давлала, лебгIеб къугъаси жуз дурабухънира тяп дубурланна хъулив урши акIнигъуна саби. ХIебиалли жузличил тянишбирнила ва чевяхIси писатель, пикрикар ГIяхIмадхан Абу-Бакарличила ил валутала ва илала хIурматбирутала пикрумачи лехIбизес даргала жамигIят цалабикни лайикьли саби. Илгъуна пикриличил, гIярбукIан гIяхIгъабза 90 дус виъниличил бархбасахъи дурабуркIуси шадлихъла балбуцличи ДГУ-ла, Дагъистанна регионна жамигIятла «Тарихла-культурала рухIла давла» организацияла, ДР-ла писательтала Союзла оргкомитетли дарганти жибирули саби. Балбуц бетурхар МяхIячкъала шагьарла Р.ХIямзатовла уличилси кьакьализибси Урусла театрла биштIаси заллизиб, декабрьла 8-личиб сягIят 16.00 дикибхIели.
Балбуцлизир бутIакьяндеш дирути сари республикализиб машгьурти гIялимтани, писательтани, поэтунани, журналистунани, жамигIятла хIяракатчибани, педагогунани, Дагъистанна эстрадала бурибти далайчибани, ГIямарла Батирайла уличилси пачалихъла музыкала-драмала Даргала театрла гIяртистунани.