ХIебла манзиллизив ургубализи дуравхъалли, илабси жагадешли чи-дигара ясирурцули вирар. Арцантала гьайбатти макьамтаур дубурла гьар рангла вавни савлилизир пишдирхъули дирар ва БерхIилис саламдикIутиван иличи хIулкIули хIердикIар.
Вавни азир рангла дирар. Сеннира гулвавнала бизиси тIемли ва малхIямси рангли адам левгIев ясирурцахъули вирар. Ил сен-сабил, чебаибмад лебтанилра чеббиркIули бирар. Илис пасихIкартани чула саркъибти пикруми дуру, далайчибани черикIла далуйти дучIа, шягIиртани уркIи-уркIиларадти назмурти пешкешдиру… Бахъла ургаб тяп ил гулвававан декIарбулхъути адамтира бирути саби. Марлира, дубурлантани чехьерти-ургар гулвававан черрикIибси сари Перзият БяхIяндовара. Чумра поэтли илисра чула бегIлара къугъати назмурти багъишладариб, журналистунани ва писательтани илала пергер баркьудлумачила ва гIибратлати гIямруличила жузи дархли цаладяхъиб. Нушала газетализирра ил зубарти-ургар вецIну шурайла бацван рах-магли рагьаррируси сари.
Перзият Кьурбановна «Замана» газеталацун марси гьалмагъ сари викIалли хатIа бетарар, ил абзурли дубурлантала умутчерси хъарихъ сари, даргантала гIямрулизир рагьарриубси кьиблама сари, дубурла жагьилти рурсбас гIибрат сари. Ил сунела лерилра гIямрулизир адамтас гIяхIдешуна риркьули ва кумек гIеббиахъули машгьурриубси сари. Илис даргантира даргла узби-рузбиван дигахъу. Иш пикри цархIилти миллатунас децIагахъес гьанбуршуси ахIен. Илини ахъти къуллукъуначир калунхIелира цалра миллат итиллизибадли декIарбарибси ахIенри. Амма халкьлис имцIали къияндешуни дихуси иш манзиллизир сунела шуцIайчибил берхIиливан халкьличи нурли чахьрикIули деркIибти гIямруличи хIерхIеили, лебгIеб халаси кумек гIеббиахъули сари сунела дигути даргантас. Иличи ил багьандан саби лебилра пахрули биркьутира.
Перзият Кьурбановна сегъуна-биалра балбуцличи жирарес дигахъу лебтасалра, сенахIенну илини сунела пасихIти гъайличил адамти хIулбуркIахъу, гIякьлула дугьбачил разибирахъу, гIяхIбаркьуначил шадбирахъу. Илини сегъуна-биалра гIяхIдеш баресгу или ахIен ил чула далдуцуначи даргантани жирируси, ил лернили дубурлантала авид жагабирахъуси саби.
Ил дуги-хIери хIеили, пикририкIули рургар гIергъисигъуна гIяхIдеш чис чебетаахъишара или. СенахIенну илини даргантала гIямруличи къячдилкути дахъал масъулти гьунчидиркахъули сари. Машгьурти поэтунас памятникуни дирнила, илдала ва илдачила жузи дурайънила, багалати далдуцуни дурадуркIнила масъулти ирзниличи мурталра илини халаси пикри бяхIчииули сари.
ХъумхIерту ил пергер дубурлан хьунул адамли республикализиб дарган мезличил дурабулхъуси ва даргантас рухIлашалси давлали бетаурси «Замана» газеталичилара. Гьар дуслизиб ил къулбасбирнила бетуцлизир илини бегIлара жигарла бутIакьяндеш дирути сари. Ишдуслизирра Перзият Кьурбановнани МяхIячкъалализир лерти лерилра школабала дарган мезла мугIяллимтас, районтазиб хIербирути гIяхIцад адамтас ил къулбасбарили сари. Ил лебгIеб халаси кумек саби редакциялис ва илаб бузути хIянчизартас. Илала дурабадлира, чула имканти лерти цархIилти даргала жамигIятлисра ил гIебасеси мисал саби. Перзият Кьурбановнани гIяхIбаркьуни дирниличи пахрубирути илдани, илала баркьуди гIебисниличи нушара дирхулра. Чисалра гьанмабикаб нушала газета къулбасбарни багьандан иличила нушани гIяхIти гъай дурули дургар или. Илгъуна хасиятла бегIти газетализиб бузути ахIен. Илаб бузутас бархьдеш, хIялалдеш дигахъу, адамли барибси гIяхIдешра хъумхIерту. Перзият Кьурбановнала пергер баркьудили разидиахъубти нушани илгъуна гIяхIбаркь пикрила дураб батесра хIедиубра кьалли. Бархьаначи буралли, илини бируси гIяхIдеш хIясибли илис мургьилара якьутлара орденти лайикьти сари. Ца адамла гIямрулизир бахълис гIяхIдешуни дирес имканти дургнира игитла баркьудигу.
ХIурматла Перзият Кьурбановна, «Замана» газетала коллективла шайзибадли хIед халаси баркалла балахъулра. Илдазибадли гьарилли хIед чIумаси арадеш, дурхIнала талихI, гъамти-тухумтала балгундеш, баркьудлумазир гьарбизуни, бузерилизир чедибдешуни дулгули сари. Гьаннала гIергъира хIу илкьяйда адамтас дигахъули, халаси хIурмат бирули, талихIра игъбарра даимти дархкьяби детаурли, хIулкIули хIерриаби, пергер дубурлан хьунул адам!
