Улкала Президент В.Путинна ХIукму хIясибли, Хайдакьла районна Мажалисла шилизивадси ургъан Надир ГIябдусаламов «Гъабзадеш багьандан» ибси медальличил шабагъатлавариб.
Н.ГIябдусаламовли Крымла Республикализиб 2017 ибил дусличибадал вягIда хIясибли гIярмиялизиб къуллукъбирули сай. Илди дусмала бухIнаб илини сай жавабкардеш дихуси, хъарбаркь ункъли таманбируси адам ва ВатIайс марси урши сайливан чебаахъиб. Россияла дявила хасси балбуц бехIбихьибти цаибти бурхIназибадал Н.ГIябдусаламовли къуллукъбируси дявила часть РФ-ла Президентли гьаладихьибти масъулти арзахъес Украинализи бархьибсири.
Ишдусла хIеблизиб Николаевскла шайчибяхI кабикибси кьяркьси дявилизир Надирлира бутIакьяндеш дариб. Дявилизир, жан ахIерахIедарили, илини гъабзадеш дакIудариб ва гьаркьятала къяйлизир дявила гьалмагъуначил варх миллатчибас чIумати къаршидеш дариб. Ил дявилизив Н.ГIябдусаламов вяхъиб ва сагъиахъес госпитальлизи каркьиб. Кьаркьа аги гIяхIбухъунхIели, ил тупала гIяскуртази шурватур. БусягIятла замана Надирли илаб къуллукъбирули сай.
Гъабзадеш дакIударни багьандан, командирли хайдакьлан дурхIя шабагъатличи гьалаихьиб.
Хайдакьла районна бекI ГIялим Темирбулатовли Надир ГIябдусаламов «Гъабзадеш багьандан» бикIуси медальличи лайикьикниличил мубараквариб ва хайдакьлан дурхIнала гьунартани шанти пахрули бирцIахъниличила буриб.
Хайдакьла районна администрацияла пресс-служба
