Первомайское шилизир хъулри гъятIаэсли барибси судла хIукмула чебкад Къаякентла районна бекIли сунела пикруми дуриб.

«Моздок — Казимагомед» бикIуси халаси газла турба Къаякентла районна Первомайское шилизибад кабихьибси саби. Ил шилизирти гIяхIцад юртани, газла турбала алавти мер-мусала хIунтIена дазула духIнар тIашдатурли сари. ХIукуматла закон хIясибли, илар юртани тIашдатес асубируси ахIен.
Юртани агарли калес асубирути 500-цад адамла ургаб, чулахъуни, дургъбала ветеранти, гьести гIямрула адамти, бегIти агарти дурхIни, чулицун дурхIни абилкьути нешани леб.
Ери-юрт гъятIаэсли судли хIукму барибти, Первомайское шила адамтала кьисматуначила, Дагъистанна ЦУР-ла «гьаргси эфирлизиб» Къаякентла районна бекI МяхIяммад Эльдархановли гьанбушиб.
«Халкьла зугIлуми нуни селрайчирра гьалар чедиулра, юртани лушес бехIбихьибхIели, илди тIашдатес асу­хIебируси мерличир кадизахъурти дазурби лерти ахIенри. Ил суалла черкад, нушала халкьла някъбазир кIел хIукму лер, чузибра судли халкь гIеббуцибти. Иличи нуша дебали разилира», — буриб МяхIяммад Эльдерхановли.
Илини хъулри тIашдатахъес декIар­дарибти ванзурбала хIекьлизирти, мерличибси администрацияли дедибти, законна дазурбачи далдикибти документуни лерли диъниличилара, цIакьбарили буриб.