БусягIятла замана бетурхуси хасси бал­буцлизир да­гъистан­лантанира жигарла бутIакьяндеш дирули сари. Душмайс мутIигI­хIе­бикIути сартан буцIи­гъун­ти дубурлантани халати гъаб­задеш дакIудирули, дявила гьалмагъуни берцахъес ва бархьдеш кабизахъес къай­гъи­бирули саби. ДекIли бяхъили биалра, илди хъули чарбухъес гьалакбикIули ахIен. Гос­питальтазиб сагъбиубли, мил­латчибачи къаршили бургъес сагадан арбашули саби. Ил ахIену ВатIан дигахъ­нила ли­шан?

Къаякентла районна Первомайскла шилизивадси, 21 дус виубси, рядовой СягIид МяхIям­ма­довлира Украинализиб бетурхуси хасси балбуцлизир бутIакьяндеш дирули сари. Илини Россияла подразделениебас дявила ярагъ диахънила шайчибси хъарбаркь таманбирули саби. Дявила хасти мурадуни тамандирухIели, игитдеш дакIударили, сунечил бархти берцахъиб. Ил ухIнавси колонналичи Украинала миллатчибани хIярхIуби чекьур. Машинализи цIадикиб. Итмаданал аги-кьяйда пикридарили, СягIидли бяхъибти 3 гIярмицлис медицинала кумек гIеббаахъиб, сунела машиналичи арбукиб ва урехиласи мерличибад геч­­бариб. Ил гьарли-марси гъабзадешла гьунар саби. СягIид уруххIейуб ва, сунела жан ахIерахIедарили, нушала бургъанти берцахъиб. Илала баркьудиличи пахрухIебарес сеналра хIейрар. Дубуртар Улкала асилти уршбала гьунартачила гъай­икIалли, дурути кахIе­дур­хар или гьанбиркур.
Дубурланти сезаманалра чIумати гьалмагъдеш дузахъути адамти саби, дявила анцIбукьуназир биалли, илдала узидеш гьатIиралра дебадирар.
Дагъистан Россияла белхъ­хIебелхъуси бутIа саб­хIели, дагъистанланти улкала хъар­­хIерагардеш батахъес мурталра хIядурли бирар.
Кьисматли нушаб замана-заманаличир имтихIян­ти дурхьули сари. Кьудратла ВегI­лисра сунени акIа­хъуб­тала хIя­лумцIес дигусигъуна бетарули саби. Ам­ма, сегъунти къияндешуни дяхIягалра, ЧевяхIси Аллагьла кумекличил илди ахъили, гьаладяхI дашес чебиркур. Нушала хала бегIтира хIурмат-кьиматличил сегъунти-дигара анцIбукьуназибад дурабулхъутири. ЧебяхIси ВатIа дергъла дусмазир, илкьяйдали дявила цархIилти анцIбукьуназирра, илдани гъабзадешла ва цадешла гьарли-марси гIибрат чебаахъибсири. Илдала гьунартачи пахрубирули халабаибси сагаси наслулира цархIилван барес хIебирар. Нушала бургъантани дявила чебла хIурмат-кьиматличил таманбирниличи ва миллатчибачибад чедибдеш сархили, хъули чарбулхъниличи рирхулра.