Октябрьла 12-личиб Мя­­хIяч­къалала бекI­ли­биубси май­дайчиб республикала Та­ру­мов­кала ва Къизларла район­низибад саби гIяхIъулали Ярагъ­ладарибти ЦIакьанази ар­кьути къазакъунала взвод гьуниб­батес республикала БекI Сергей Меликовра, МяхIяч­къалала ва Грозныйла Ар­хие­пис­коп Варлаамра, Да­гъис­танна муфтийла за­меститель ГI.Мя­хIям­ма­дов­ра, ДР-ла Халкьла Соб­ра­ние­ла депутат Нур­бя­хIянд НурбяхIяндовра, му­ни­ци­па­литетунала гьуни че­би­ахъути ва жавабла хIян­чи­зар­тира, гIярмиялизи аркьу­тала юл­дашуни, тухум­тира му­за­бухъун.

Дагъистанна Правительствола бузерила Юртла мякьлабси халали ахIенси церковьлизиб саби гIяхIъулали ВатIан батахъес дурабухъунти къазакъунас урусла динна вакилтани балга-дугIя дариб.
Ишаб бурес чебиркур церковьличи мешуси мижитра Правительствола Юртла балуй шайчиб лебниличила.
Илкьяйдали илаб Дагъистанна миллатунала балгундешра гьаргбиуб. Ярагъладарибти ЦIакьаназиб къуллукъ­барес саби гIяхIъулали ар­­­кьулри кIарахъан, Тару­мов­­­кала районна Георгиевск шила бекIли узуси ХIя­­­­­бибуллагь ХIялимов ва Къиз­­­­ларла районнизивадси дар­­ган МяхIяммадгIяли ХIя­жи­­­мяхIяммадов.
«Ну Ахъушала районна Усишала шилизивадсира, да­хъал дусмазив Къизларла районнизив хIерирулра. Ну гIяр­миялизи укьес дигули воен­­коматлизи ва­­кIибсири. Тух­туртази комис­сия барахъира, амма ну военкоматли кьабулхIерира. ХIе­ла дусмала адамти бархьес асу­би­рули ахIен бикIули саби илди. Ну 61 дус виублира, аралира. Къазакъунала вз­вод къуллукъбарес аркьниличила багьур­хIе­ли, илдачи дугьаизурра.
Илдани чучил варх аркниличи разилира», — буриб МяхIяммадгIяли ХIя­жи­мяхIяммадовли.
— ХIела хъалибарг агарав, илди хIу къуллукъбарес аркьниличи разилив?
— Дила авал дурхIяра, верхIел дурхIяла дурхIяра леб. Лебилра чула мерличиб хъалибаргуначил хIербирули саби, илдала челябкьла даршусили калахъес багьандан ургъес хIя­дурлира, — жаваб чарбариб МяхIям­­мадгIялини.
Сай гIяхIъулали гIярмия­лизи аркьниличила бурахъес ХIя­­би­буллагь ХIяли­мов­личира дугьа­ризурра.
— Ярагъладарибти ЦIакьа­на­зи аркьути уршби нуни дахъал дусмазиб балути саби, гIяярличи, бялихъуни дуцес, ша­дибгьунчи дарх дашули ка­лунтира. Къияндикалли, уз­ба­ниван кумекбирниличи вир­­хулра. Илди бархьили ну хъулив калес хIейубра. Гьайгьайрагу бегIтани, рузбани, унрубани, — нуша Дагъистаннизир хIердирулра, унрубира нушала хъалибарг саби, — дукаркIулри ил, — тIама-гьама ахъдуциб. Илдази дила юлдашуначил арукьес чIумаси кьасличила аргъахъира, илхIели лебилра паргъаткабиуб, — викIи ХIябибуллагь.
Майдайчи цалабикибтачи дугьаилзули республикала БекI Сергей Меликов викIулри: «Мурталра дарх ва мякьлар диреная! Цалис цали кумекбирулицун чедибдеш сархес вирар. ВатIайчи диги, гъабзадеш, адамдеш нушала халкьличи хасти сари. ХIушала уркIила жи хIясибли Ярагъладарибти ЦIа­кьанази аркьнилира хIу­шала гъабзадешличила, гьар­ли-марти къазакъунира дубурлантира диъниличила бурули саби».
Илдачи Архиепископ Варлаамра дугьаизур: «Нушала дудешунира, хала дудешунира миллатличи ва динничи хIерхIеили барх дурабулхъутири. Илкьяйдали ишбархIира декIар-декIарти миллатунала халкьани дурабулхънили, нушани халкьла гIядатуни мяхI­кам­­дирниличила бурули саби. ДурхIни, хIушала цIакьани ва урехиагардеш имцIадиаб. Ну­ша хIуша багьандан дул­гехIе».
Сунела яргализив бургъантачи дугьаизур муфтийла заместитель ГI.МяхIяммадовра: «Вирхнили адам гIяхIдешличи ва жавабкардешличи бурсивирули сай. Вирхуси адамли бегI гьалар сунела хъалибаргла, гъамтала, халкьла гьалар жавабкардеш дихути сари. Ил саби ВатIайчи диги. Нушани ВатIа гьалаб жавабкардеш дихути сари. Хъуммартидая хIушала гъамти хIушачил биъни, хIушачила булгули биъни».