Дубурлантала жагати гIя­да­туна­чила, гъаб­за­дешла бар­кьудлумачила ну­шала ул­ка­­ли­зибцунра ахIи, дурала улк­на­зи­ра ха­бардерхурти сари. Дигалли спорт­ла ареналичиб, ди­галли улкалис къиян­ди­кибхIели, дявила май­дайчир игитти бар­кьуд­луми дура­дур­­кIули, дигалли бузерила маргь­личил сархибдешуни дирахъули, мукъри-сяхI­ба­туначир далай-делхъла къу­гъати агурби зай­дикIахъули гьайбатли бат­бул­хъули, мурталра гьалабяхI башути саби Дубуртар Ул­кала багьадурти.

Даршуси закла удир жагати гIядатунала бетуцлизир дирути дубурлантала мукъри урусла жагьилтасра гIяхIдилзни якьинбиуб ишди бурхIназиб. Гьайгьай, лебтасалра гIяхI­бизур Казаньнизибадли Да­ха­даев­ла районна Кубачила шилизи ба­кIили, жа­гьил­та­ни мекъ барни. Илдани гIяр­бу­кIан­­тала мекъла гIядатунира пайдаладарили, дура­беркIибсири ил шадлихъ.
Кубачила шилизир жявхIейчирадли ду­захъути гIядатуни хIясибли мекъ барили гIергъи цIикури шичи рукиб ва илизи хъули чаррухъунхIели хинкIи дарахъиб. ЦIикурира илала гьалмагъра лезинка делхъла мявализи кабухъун ва цалабикибти разибиахъуб. Илди кIелра гIярбукIантала палтарличил сабира бегIбиублири.
Северный Кавказлизир мукъри дирес дигути туристуни гьачамличиб-гьа­чам имцIабикIули саби. Илкьяйдали, дигай ди­хьибтани пайдаласи архIяличил чула кьисматла бутIара бархбирхъули саби. ГIергъиси замана Дубуртар Улкализи башути туристунани чебиули саби дубурлантани гIяхIлала бируси хIурмат, илдала къугъати гIядатуни ва сабира илдигъунти бетуцунала бутIакьянчибили биэс дигули саби.
Кубачила шилизивадси Расул Куртаев­ жагьилтас кумекбарес разиикиб. ГIяр­бу­­кIантани чула мукърачирван гьарил се­кIал гьунчидикахъиб ва музыкара дяхъили далай-делхъ дехIдихьиб. Уруслантира гIяр­бу­­кIантала палтарличил бегIбиубли, шила шантачил бархбикили, жагьилти гIеб­буциб.
Ишаб бурес чебиркур дубурлантала гIя­датуни гIяхIдизурси цархIил туристли Та­ба­саранна районна Хучнила чяхI-чяхIила мер-мусаличиб сунела уркIили черрикIибси рур­силизи дигай гьаргдариб ва ил сунес шери ракIес разириркурал хьарбаиб. Рурси разирикиб. ХIера, жагьилтани секьяйда жа­гати гIядатуни чердиркIулил, илди чула гIям­­рулизир хъумхIертести анцIбукьунили де­­тарахъули.
Чисалра дигIяндеш ахIен, гьанналаур ца­цабехIтани хабурти тIинтIдирутири да­гъис­танланти кьяркьти ва культурализиб гIелакабулхъути саби или. Илди къянала баянти урдирхънилис сабабли бетаур гIергъиси замана нушачи башути туристуни имцIабикIни. Илди вегIла гъамтиван ва бахъхIила тянишуниван дубурлантани кьабулбирухIели, илдала биубцад хIурматбирухIели россиялантани аргъиб Дагъистаннизир дахъал миллатунар халкьанала гIядатуни, культура ва гIяхIлас дяхI шалали гьунибиъни ахъси даражаличир диъни. Илис ахIену илгъуна жагадешла варачайзи чула узидешла урунжунира дархиэс илди къайгънабиркьути.