Гьанна школала бучIантала бегIтас гьамадли ахIенси замана саби. ДурхIя школализи хIядурварни къиянси хIянчи саби. Ил масъала арзахъес кумекличи музабухъун “Цаси Россия” партияра, “ДурхIя школализи хIядурвара” ибси балбуц бузесаили.

МягIничебси балбуц
Сер­го­къалала районна ад­ми­нист­рацияла заллизиб лебил Рос­сия­ла «ДурхIя школализи хIя­дур­вара» бикIуси балбуц дура­бер­кIиб.
Ил балбуц хIясибли, районна администрацияли гIям­­рула къиянти шуртIразиб хIер­бирути дурхIнас ва илдала бегIтас кумеклис школала гIягI­­ниахълуми — тетрадуни, кьа­­ламти, альбомти, гуашь краска ва цархIилти секIал пеш­­кешдариб.
Илкьяйдали районна бекI­ла заместитель Баркакьади Ма­­­жидовли ва районна жа­гьил­тала къуллукъунала шай­чивси специалист Мурад Му­­саевли бучIантас на­си­хIятла дугьби дуриб ва бел­чIу­дилизир сархибдешуни дал­гун.
Бурес чебиркур, ил балбуц сентябрьла 1-личи би­кайчи бухъянбитIун.
ДурхIни лебти, амма къиянси яшавла шуртIразир хIе­р­дирути хъалибаргунас ку­мек­барес дигули диадалли, районна ад­министрациялизи ду­гьа­д­изес дирудая.
ГIяхIбаркьуни дурадуркIули
ДуцIрум ахирличи дир­кухIели ва дурхIнала каникулти тамандиубхIели дебали мягIничебси манзил бехIбирхьуси саби. Ил сентябрьличиб шадлихъла аги-хIяйзиб гьарил школализиб дурабуркIуси багьудлумала БархIи саби, бучIантани чула багьудлумала духем чебирцIахъес бехIбирхьуси манзил саби.
Илгъуна шаласи анцIбукьличи ункъли хIядурбиэс имканти агартира лебни пикрилизи касили, республикала школабази дурхIни бархьес кумекбикIути ва илди гьундурачиб мяхIкамли бирахъес къайгъилизибтира камли ахIен.
Россияла гIяхIбаркьла «ДурхIя школализи хIядурвара» ибси балбуцла дазурбазир, дурадуркIути сари бучIантас кумек гIеббиахънила баркьудлуми. Илизир бу­тIа­кьяндеш дирули сари Дахадаевла районна ОМВД-ла хIянчизартанира. Илди яшавлашал къиянси агилизирти хъалибаргуначи бякьун ва багьудлумала БархIиличил дурхIни мубаракбариб. Илдани ункъли бучIули ва гIяхIти бухъя-зегъаличил дурхI­нани чула бегIти ва мугIяллимти ра­зи­бирули дигниличила багьахъур. ДурхI­нас илдани гIямрулизир багалади­эс­ти насихIятуни дуриб, гьундурачибад ба­шу­хIели ва лерилра гIямрулизиб чула арадеш мяхIкамбирули, гьарил секIайчи че­кабизурли вяшбикIахъес хIяжатли биъни­личила баянбариб.
Илдани дурхIнас белчIудилизир хIя­жат­­диркути масанира пеш­кешдариб.

Шадли замана беркIиб
Ахъушала районнизиб «ДурхIя школализи хIядурвара» бикIуси балбуцла дазурбазиб 30 дурхIя белчIудилизир хIя­жатдиркути ваяхIличил гIеббуцили саби.
Муниципалитетлизибси социальный къул­лукъуни гIердурцуси центрлизиб гIяхI­баркьла фонд «Инсанничил» цабиубли урга даражала 1-ибил школализиб къиянти шуртIрачилти хъалибаргуназибадти дурхIнас «ДурхIя школализи хIядурвара» бикIуси байрам-балбуц дураберкIиб.
Иличир Ахъушала районнизибси «Ин­сан» фондлис гьуни чебиахъуси Шамил Мя­хIяммадовли, балугълахIебаибти дурхI­на­чилси хIянчи дурабуркIуси инспектор МяхIяммад Амировли, дурхIнас ва дурхI­на­чилти хъалибаргунас социальный къуллукъуни гIердурцуси отделла заведующий Арсен ХIяжимяхIяммадовли, дурхIнала бегIтани ва цархIилти гIяхIлани бутIакьяндеш дариб.
Илар викторинаби, тамашала конкурсуни дурадеркIиб. Илдазиб чедибикибти савгъатуначил разибариб. ДурхIнани шадли замана беркIиб.
ДурхIни сагали бехIбирхьуси бел­чIу­дила дусличил мубаракбариб, ва илдас белчIудилизир сархибдешуни далгун. ДурхIнира илдала бегIтира савгъатуначи разили калун, ва балбуц дураберкIибтас баркалла багьахъур.
Ил балбуцличир 30 дур­хIялис школала форма, бел­чIудилизир хIяжатдиркути тетрадуни, ручкаби, кьаламти, альбомти, краскаби савгъатдариб.