Августла 23-личиб МяхIячкъалализиб Дагъистан Республикала багьудила учреждениебала хIянчизартала августличиб дурабуркIуси совещание бетерхур, сабира ДР-ла багьудила ва гIилмула Министерстволи хIядурбарибси.
Балбуц ибхьули, ДР-ла Правительствола Председатель ГIябдулмуслим ГIябдулмуслимовли, белчIудила сагаси дуслизир цацадехIти дарсдешуни дирар или багьахъур, чучира жамигIят ва дурхIнала бегIти илцадра хIерти.
«2022 ибил дуслизиб республикализир багьудила ишбархIила тIалабуначи далдикахъибти 171 центр ибхьу, чусра цаси «ГьаладяхI дашахъуси мер» ибси у бедибти. Илдазир дузахъути сари бекIлибиубси ва чеимцIаси багьудила сагадарибти программаби. Илкьяйдали, Каспийскла 13 ибил школа хьулчили буцили, биштIатала «Кванториум» бикIуси технопарк абхьес пикрибарибси саби», — викIи ГI. ГIябдулмуслимов.
ДР-ла багьудила ва гIилмула Министр ЯхIъя Бучаевли, сунела яргаличиб, белчIудила гъамбикIуси дуслизиб республикала багьудила кабиз гьалабяхI башахънила бекIлидиубти бяхIчибизуначила буриб.
«ИшбархIилис 191 школала 210 юртлизирад 137 багьудила организациялизир ремонтла хIянчи тамай ахирличи дикахъили сари. ЦахIнабси багьудила 27 организациялизир биалли, ремонтла хIянчи 97-99 процентла кьадарлизир тамандиубли сари, 33 объектличир — хIянчи ахирличи диркахъули лерал», — масъала баянбариб министрли.
Илини илкьяйдали багьахъур сентябрьла 1-личирад 1-ибил ва 5-ибил классунала бучIанти сагаси программа хIясибли бучIахъу или.
РФ-ла багьудлуми тIинтIдирнила Министерствола дурхIнала ихтиюрти далтахънила шайчибси Департаментла директорла заместитель Юлия Сачкони Россиялизиб белчIудила 2022-2023-ибил дуслизиб багьуди къелгIеббикахънила шайчирти бекIлидиубти бяхIчибизуначила багьахъур.
«Нушани «Воспитатель года» ва «Учитель года» конкурсуни ишдуслизирра дурадуркIехIе, чузира 2022 ибил дуслизир бел­чIу­дилизир чула хасти тIалабуни лерти дурхIни руркъути учительтас хасдарибти 3 номинация кадерхахъурти — «Педагог —пси­холог», «Учитель – дефектолог» ва «Учитель – логопед», — рикIи ил.
Балбуц ахирличи биркахъули, багьудила цацабехIти хIянчизартас ДР-ла пачалихъла шабагъатуни дедиб.