Адам виштIахIели секьяйда бурхIни ардашулил бекIлил шак­хIер­кусиван билзан. Жагь­хIелира гIямрула бурхIни шалгIер­дулхъ­­ниличила пикриикIес замана хIе­би­рар. ГIур хъали-цIа, биштIати ва да­хъал дарести дирар, гьар секIайчила хъу­муртахъути. Илкьяйдали шакалра хIей­кили, адамличи ухънадеш гъам­ди­кIули сари. Гьайгьай, бахълис-де­кIар ухънадешра лугути ахIен, илди де­дибсини къугъали деркIесра ба­гьес хIяжатси саби. Ухънала гIямру жа­га­дирути сари имцIаливан алавтала къайгъначирли ва баркьудлумачирли. Де­бали жагаси баркьуди саби гьести гIям­рула адамлис кумекбирни, ил гIе­вурцни ва илала мурад бирни. Ил­ди­гъунти гIяхIбаркьуначила Да­ха­даевла рай­онна адамтани мурталра хъу­муртуси ахIен.

ХIера, районна яшавлашал къуллукъуни гIердиахънила цахIнабси Центрли «Социальный туризм» бикIуси балбуц жигарчебли гIеббуциб. ХIерила замана гьести гIям­ру­ла адамтасра чулахъунасра къуллукъбирнила отделениела хIянчизартани чули къуллукъ гIеб­биахъути адамтас Дахадаевла район­на тарихлашал халаси кьад­ри лебти мераначи, цабутIаван Ширала ши­лизибси дурхъаси мерличи (шайхла хIяб­личи) бук­иб. Дагъистанна цархIилти мер-муса­ли­чи­­бад­ра ила гьар дуслизиб ба­хъал халкь цала­­бирк­­ни гIядатли бетаурли саби. Шайх ХIясан ургъули кали уили сай, илди мер-мусаличиб бусурман дин кабизахъес багьандан. Динничи къаршитани ил кавшибси сай.
Дурхъаси мерличи центрлизибадти 16 адамли архIя дураберкIиб. Ил дурхъаси мерличибад ГIям­муз­гила шира гьарахъли ахIен. Илала мякьлар лебтанилра пайдаладирути, дар­ма шин лерти сари. Иш гьакIлисра леб­танилра илди шинра дарх касиб, алав­ти мер-мусаличирадли дарма кьарра дучиб.
Бурес чебиркур, илдигъунти ар­хIя­­бани гьести гIямрула адамти ур­кIи­­чеб­биру. Гьарил ила вякьунси халаси разидешличил ва уркIи ряхIяткабиубли арвашули вирар.