Хайдакьла районна Баршамайлизибси школала ручIан Асият ДинмяхIяммадовани «БелчIудилизир диахъубти сархибдешунас» бикIуси медаль сархиб ва хIунтIена аттестатличил школа таманбариб.

Асият школала пахрули рирусири. 1-ибил класслизирадал илини шула кьиматуницун сарри кайсути.
Сунела кьиматуначи ва багьудлумачи хIерхIеили, Асият ЕГЭ-бачи дебали халаси жавабкардешличил хIядурриуб. Ил багьандан, баллани хIясибли, районнна цархIилти медалистуни-ургар Асият декIаррухъун. Урус мезла ва математикала илини шула кьиматуни (90-цад балл) касиб.
«Баркалла нушала мугIяллимтас, 11 дусла духIнар нушази кадихьибти багьудлумас, дяркъяхъурти гIямрула шуртIрас. ХIушала дурсри, гIямрулизир нушани хъумхIертехIе. УркIи-уркIилабад халаси баркалла балахъулра хIушаб», — рикIи Асият ДинмяхIяммадова.
Хайдакьла районна администрацияла пресс-служба