Республикала тах шагьарла дайла мерлабиубси ДР-ла Поэзияла Театр гIяхIлачи мурталра хIерси саби. Ила замана-заманаличиб шягIиртала къугъаси къушум цалабиркулира бирар. Иш гьакIлисра ила поэтуни, писательти, журналистуни, гIяртистуни, къуллукъла хIянчизарти цалабиркескабииб.
Дахадаевла районна Меусишала шилизивадси РФ-ла урибси мугIяллим, ДР-ла халкьла писатель, Россияла Федерацияла цахIнабси багьудила ХIурматла хIянчизар, ДР-ла культурала урибси хIянчизар, Россияла писательтала Союзла член БяхIяммадов Расул Мусаевич сайри иш гьакIлис лебталалра пикрила дайлавси. Илала юбилейличи бахъал гIяхIли цалабикилри.
Дагъистанна писательтала Союзла председатель, ДР-ла халкьла поэт МяхIяммад ГIяхIмадовли шадлихъ бехIбихьниличила багьахъур. Илинири балбуц бузахъусира. Заллизир музыка зайдухъун ва кабиибтачи бяхIчиси халаси экраннизир Расул БяхIяммадовла гIямруличила, ил акIубси шиличила «Дила ши – Меусиша» ибси къантIти баянтачилти видеороликуни дагьардиуб.
ГIур писательличила чула пикруми дурули гIяхIли гъайбулхъескабииб.
ДР-ла культурала министрла цаибил заместитель Мухтар Кьурбановли, миллатла политикала ва динанала баркьудлумала шайчивси министрла цаибил заместитель Гьарун Давыдовли, Дагъистан Республикала багьудила ва гIилмула Министерствола насихIятчи Барият ХIяжиевани, Россияла гIилмуртала академияла член-корреспондент, Дагъистанна федеральный ахтардила (исследовательский) РАН-на центрла директор Ахъай МуртазагIялиевли, ДГУ-ла проректор, историяла гIилмуртала доктор, профессор МяхIяммад ХIясановли, Дагъистанна регионна жамигIятла «Тарихла-культурала рухIла давла» организацияла руководитель Перзият БяхIяндовани, филологияла гIилмуртала доктор, профессор, ДГПУ-ла кафедрала заведующий, Дагъистанна писательтала Союзла кIарахъала секцияла руководитель МяхIяммад МяхIяммадовли, ДГУ-ла юридический институтла директорла заместитель, Россияла писательтала Союзла член, ДР-ла урибси юрист, ДР-ла искусствобала урибси хIяракатчи МяхIяммадзапир ГIябдуллаевли, Дагъистанна писательтала Союзла урусла секцияла руководитель, Дагъистанна халкьла поэт Марина ГIяхIмадовани, Дагъистанна писательтала Союзла къумукъла секцияла руководитель, Дагъистанна халкьла поэт Шейитханум ГIялишевани, Россияла писательтала ва журналистунала союзунала член, ДР-ла урибси мугIяллим Ибрагьим Ибрагьимовли, юбилярла гъамти юлдашуни ва цакурсланти ГIиса ГIямаровли ва ГIялихIяжи МяхIяммадрасуловли, цар-хIилти къуллукъунала хIянчизартани Расул Мусаевич уркIи-уркIилавад мубараквариб ва къугъати гъай дуриб.
Театрла жаняхIлизиб юбилярла жузала выставка жагали балкьаахъурлири Миллатла библиотекала хIянчизар Салимат ХIяжиевани.
Шадлихъличир Даргала театрла гIяртистунани Расул Мусаевичла произведениебазирадли бутIни гьаладихьиб, назмурти ва далуйти делчIун. «ГIянтIикIа» бикIуси Р.БяхIяммадовла пьеса хIясибли кабихьибси спектакльлизибадли бутIа гьалабихьиб ДР-ла бурибти гIяртистуни Р.ИсмягIиловани ва М.Шамиловли. Театрла гIяртист М.ХIусеновли юбилярла «Се дариша наб гIямру» ибси назмуличил далай белчIун ва «Сен гьарзасив иш дунъя?», «ВалхIейкибси хIякимлис» ибти назмурти делчIун. «Расуллис деза» ибси далай зайбухъахъун ДР-ла культурала рурибси хIянчизар С.Шагьмандаровани.
Далуйти делчIун илкьяйдали М.ШяхIбановли, ХI.Ибрагьимовани, П.Камаловани, Ш.ХIусейновли.
ДГУ-ла культурала факультетла доцент Зури Темирбековани бекIдеш дирнила удиб студентунани Р.БяхIяммадовла произведениебазирад бутIни устадешличил гьаладихьиб.
Балбуцлизиб бегIлара жагаси баркьудири Расул Мусаевич сунела хъалибаргличил сценаличи дуравхъни. Сунела уршби-рурсбала ва илдала баркьибтала ургав ил вава-кьарла дайлаб бучIуси булбулличи мешуиркулри. Ил цалабикибтачи дугьаизурли, илдас баркалла балахъули, гъайикIулри, назмурти дучIулри. Гьайгьай, заллизи кабиибти хIулкIули Расул БяхIяммадовла пергер хъалибаргличи хIилнабиркьулри ва баркаллала дугьби малхIямли тикрардирулри, илгъуна къугъаси кулпетра гIямрула бархьси гьунчи дураили, 60 дус шила дурхIнира бучIахъули, гIяхIцад художественный жузира дураънилис.
ГIе, адамла цадехI гIямрулизир илдигъунти черяхIти баркьудлуми дурадеркIни игитси баркьудилизи халбарес вирар. Илдигъунти гIяхIгъубзнас мургьила орденти дедлугути диалри, Расул Мусаевичлис цацун лайикьли ахIенри. Илала дурабадлира, халкьла баркалла ва хIурмат ордентачирра медальтачирра дурхъати сари.
Шадлихъла ахирличиб Р.БяхIяммадовла уршби-рурсбани балбуцла бутIакьянчиби рестораннизи жибариб ва илдала халаси хIурматбариб.
ХIурматла Расул Мусаевич, «Замана» газетала къугъаси коллективла шайзивадли хIуни 90 дусла дазу хIурматличил ва ахъти адаб-хIяяличил ахъниличил мубаракирулри. ХIед ва хIела 7 урши-рурсилис, илдачибадли акIубтас, хIела гъамтас, шантас арати ва талихIчерти гIямру дулгули сари.
