Хайдакьла районнизиб Афганистаннизир ва Венгриялизир диубти анцIбукьунала ветеранти шабагъатлабирнила балбуц бетерхур.
Ил дураберкIиб районна администрацияла бекIла заместитель Халитбек Халитбековла кабинетлизиб.
Балбуцличи жибариб: Венгриялизир кадикибти анцIбукьунала бутIакьянчи — Иманзагьир Саламов ва Афганистанна дявила анцIбукьунала ветеран — Ражаб Наврузов. Илар бутIакьяндеш дариб Хайдакьла районна шайчибси УСЗН-ла бекIла къуллукъ бузахъуси МяхIяммадрасул Исламовли, дявила ва бузерила ветерантала Советла председатель Кьадибаймат Кьадибайматовли.
Балбуц бехIбирхьули гъайухъунси Х.Халитбековли ДР-ла бузерила ва социальный бяхIчибизлизиб гьалабяхI башнила Министерствола хъарбаркь хIясибли, адамти хIербирути шуртIри къулайдарес ибси пикриличил, илди сертификатуни дедлугути сари или буриб.
«АхIерти ветеранти, муниципалитетла бекI ГI.Темирбулатовла ва дила шайзирад хIуша уркIи-уркIиларад мубаракдирулрая. Илди сертификатуни хIушаб халаси кумекли детарар. ЧIумаси арадеш ва гIеркъати гIямру хIушаб дулгулра!», — или бурили гIергъи, арцла сертификатуни пешкешдариб.
Мубаракла дугьбачил гъайбухъун — М.Исламов ва Кь.Кьадибайматовра.
«Нуша ишар цаладикилра, чула дявила къуллукъ жагали хъараахъурти, нушала цаванзаланти мубаракбарес. Дунъяличир лерти гIяхIдешуни хIушаб дулгулра. ГIямрула бурхIни разитили ва шалатили диаб», — бикIи илди.
Чула яргализиб, ветерантани баркалла багьахъур ДР-ла бузерила ва социальный бяхIчибизлизиб гьалабяхI башнила Министерстволис, муниципалитетла руководстволис ва социальный бяхIчибизлашал адамти гIеббурцнила Управлениелис.
