Дубуртазир хIеб сахаватти диалли, дуцIрум жагати ва гIебшни баракатла дирар.
Илдигъунти тIабигIятла някьишли янилис балгунси кьумур хIядурбиру. Адамра илди тIабигIятла манзилтачил цугуцес вирар. ХIебли гIямру савгъатдарибси инсан дуцIрумлизив БерхIила нурли кьуватчеввиру ва жагьвирахъу, гIебшнилизир илала дусми дерхъили дирар алкIути дурхI­начил ва дурадуркIути къугъати баркь-бацличил. Янилизир биалли, дурхIнира гIямрула бягIуси гьунчи гьуниббатурли, дусмадли учикадикибти пагьмуртала гье делгIес замана пайдалабиру. ИмцIаливан жагьхIели бучибси гIямрула пасихIдешла хунжи гьаргдарили, илала кумекличил иш­хIелла гIямрула дяхIимцIала – творчествола някьиш устадешла сихIрула кьаламличил ал­кIахъули узар. ХIера, ил тух­­турли рузуси пергер адамли сихIрула кьалам някълизи касибхIейчирадли гIяхIцад дубурла урунжунала шин урхьнази даили сари. Ил сари Дубуртар Улкали сунела зурбаси хъатла – биштIаси шила янаша каратурли, мяхI­камли арикьурси, машгьурси дарган Бибалаева ГIяйшат Кьур­бановна. Гьайгьайрагу, илала шантани – трисанчилантани пахрубирули саби чула шилизирадси, илгъуна хабардерхурси, пергер хьунул адамличи. Ашкарлигу, ил хIебли чус савгъатбарибси дурхъаси сав­гъатра саби.

ГIяйшат Кьурбановна сунес бахъ ахIерли бетаурси Дахадаевла районнизирцунра ахIи, лебилра республикализирра сунени дурадуркIути гIяхI­баркьуначил ва пасихIти бел­кIаначил машгьурриубси сари. ГIяй­шатли тухтурла санигIят чеб­бикIибси саби бахълис гIяхI­деш барес рирни сабабли­. Илини сунени зягIиптас ва къиян­дикибтас кумекбирулицунра ахIи, цархIилтира илгъуна багаласи баркьудиличи бурсибирули сари. Ил секIал марбирули саби МяхIячкъала шагьарла дурхIнала кIиибил поликлиникализиб иличил барх бузути жагьилти ва гьес­ти гIямрула специалистунани. Мурт ГIяйшатла кабинетлизи ацIаллира, илаб илгъуна чере­таибси гьаркьяла устадеш гIе­расес кьаслизибти тухтурти, биштIати зягIипбикили кумек­личи музабухъунти дурхI­нала бегIти ва цархIилти ма­съултазиб илала кумекличи хIяжатдеш акIубти адамти кам­­хIебирар. Дахадаевла районна шимазибадлицунра ахIи, декIар-декIарти мер-му­са­­личибадлира хIякимтани ва авараагарти адамтани яра цар­­хIилти масъултани инжит­ба­рибти дубурланти, шагьарланти иличи гьаббикIули бирар. Чи сегъуна масъайчил ду­гьаизаллира ГI.Бибалаевани му­рад хIе­ба­ри­ли хIелта. Се­на­хIенну илала шагьарлизиб хIурмат халаси саби, илини балути декIар-де­кIарти са­ни­гIятунала адамтани илини ибси хIебаресра хIе­бирар. БекI­лил хIебалути адамтасра бархли кумекбарес хIядурси сари ил.
Старшая сестрала санигIят­ра ламусличил бузахъули, илкьяйдали бахълис гIяхIдешуни диресра замана бургули хIер­ка­рирули сари ил. Илдигъунти минуталра акьудеш агарти баркь-бацлизир ГIяйшат Кьурбановнала гIямрула бурхIни дягIли садирхъути жузла кIапI­ри­ван, бикIуливан, шакалра хIе­рикили, шалгIердулхъули сари. ХIялай-залай рузули, бархьдеш багьандан къаркъаван каризурли, творчестволизир бархIиличи-бархIи ахърикIули, гьаларяхI рашули, ил ишдуслизир 75 дусла хIеб­лис гьунириули сари. Сунела ман­пагIятти баркьудлумачил цуг­дуцибхIели, илди дусми 750 лугIиличил цугдиркули сари. СенахIенну ил гIяхIцад адамтани дирути дирес бажардириркули сари.
Сен-биалра, дусми чула ца минуталра убхIебатурли гьаладяхI гьуцIли сари. Илди дусми вегIла баркьудлумачил умцес саби кавлуси. ГIяйшатли илди биалли, чилалра гьалар урузхIериэсли деркIили сари.
ГIяйшатла гIямруличила, баркь-бацличила Аминат ГIяб­ду­рашидовани ва илала рурси Айлинни дебали жагали балкьаахъурси документальный фильм чебаахъиб гьалабван, Р.ХIям­затовла уличилси Миллат­ла библиотекализиб ду­ра­бер­кIиб­си балбуцличиб. Цалабикиб­тас имканбакIиб илхIели ГIяйшат Кьурбановна бузерила мерличир, сари акIубси шилизир ва тухумти-юлдашуначил их­тилатрикIули, назмурти дучIули, бузерилизи ахъили чераэс.
Балбуц бузахъулри ГIяй­шат Кьурбановнала мурул Мя­хIям­мадла узи МуртазагIяли Бибалаевли. Илини бегI гьалаб гъай бедиб Айлиннизи. Нешлира рурсилира ГIяйшат Кьурбановна акIубси бархIиличил мубаракрариб ва илис арадешра талихIра дулгули диъни багьахъур. Дахъал гъай хIе­да­рили, илдани бурес дигуси чула пергер хIянчилизиб гьалабихьиб. Фильм дигиличил кьа­булбариб цалабикибтанира.
ГI.Бибалаевала гIямрулис, бу­­зе­рилис ва пагьмулис хас­­ба­рибси фильм ахирличи би­­кили гIер­гъи, балбуц рестораннизиб даимбариб. Илар мекъ-сяхI­бат­лис­ван хIя­­дур­дарибти стол­ти-алав ка­­биа­хъес бал­буцличи ба­кIибти жибариб. Зай­дикIулри музыка, да­луйти, наз­мурти, му­ба­рак­ла дугь­би.
Ил жагаси шадлихъла дазурбазиб уркIила ванати дугьбачил юбиляр мубаракрирули, гъайбухъун иличил барх ­дахъал дусмазиб бузути тухтурти, поэтуни, журналистуни, юбилярла тухумти, шанти, гьалмагъуни… Гьарилли чус ахIерси ва халаси хIурматличи лайикьси дубурлан хьунул адамлис лебгIеб ахъси кьимат лугулри ва уркIи-уркIиларад илис дахъал арати ва талихIчерти гIямру дулгулри.
Шадлихъличи бакIибтас бар­каллала дугьби дурули гъай­рухъун ГIяйшатла рурси, Да­хадаевла районна бекIла за­меститель Алена ГIяб­дул­лаева.
ГIяйшат Кьурбановнала «Ва, дурхъати адамти…» би­кIу­си нузмула тугъачил белкI ахир­личи бикахъес дигулра:
…ГIямрула къантIдешличи
Пикридухъенаягу,
Ва ахIерти адамти,
Мадиршидая дару!

ГIямрулис агъу сари
Гъаргъдеш – илбисла макру!
Ва, дурхъати адамти,
МутIигIмайрудаягу!

Адамдеш хIердарая,
МяхIкамли мар мургьиван,
Агара, багьирая,
Давла чебяхIси илван!