Даг, апрельла 6-личиб, улкала Президент Владимир Путинна Дагъистан Республикала БекI Сергей Меликовличил гьунибаъни бетерхур.
Илала дазурбазир, регионнизирти социальный бяхIчибизла-экономикала аги-кьяйда пикридариб. Ил лугIилизир ахъдуциб коронавирусла чейхъуси изайс къаршидеш дирнила, промышленностьла, шила хозяйствола, адамти хутIличил ва тIабигIятла газличил гIеббурнила масъултира.
Коронавирусла чейхъуси изайс къаршидеш дирниличила гъайикIули, ДР-ла БекIли буриб: «Вакцинаби дирнила шайчир гIяхIти хIясилти лер. Лер 90 процентличирра имцIали прививкаби дарахъибти дубурла районтира. Нуша дуб-дубли Россияла аргабси даражала кьадарличи гъамдикIулра. Ил шайчиб, гьайгьайрагу, халаси асарбирули саби халкьличил дурабуркIуси иргъахънила хIянчиличира».
Аргъбаибти масъулти сарливан, хаслира пикри бяхIчиаиб адамти хутIличил, тIабигIятла газличил, шинничил гIеббурцнила масъултачи.
«Дебали челукьути, амма арзес халаси замана хIяжатти масъулти сари. Бурес чебирур, Дагъистаннизиб гьанна бикайчи шинничил гIеббурцнила схема агарсири, ил шайчир нушани, шин лерли хьалли, проводуни тIашдалтнила дархьти тяхIяр-кьяйда чердикIес къиянбулхъули саби. БегI гьалабси яргализир халати шагьуртазир масъулти алкIули сари – МяхIячкъалализир, Каспийсклизир, Избербашлизир», — викIи регионна БекI.
Улкала Президент В.Путинни багьахъурливан, Кавказлизиб, ил лугIилизиб – Дагъистаннизибра, гIяхIцад замана бегIлара аргъбаибси масъалали кавлусири – хIянчила мерани агнила. Илини бузерила сагати мерани акIахъес багьандан, сегъунти инвестициябала проектуни гIердуцалли гIяхIсилра хьарбаиб.
Сунела яргализиб, ДР-ла БекI С.Меликовли буриб: «ГIяхIцад предприятиеби «дяхIцIилиурад» дурадухъахънила кумекличил, дахъ хIянчила мерани акIахъес имканбакIиб. Гьайгьайрагу, республикалис ил масъала аргъбаибсили кавлули саби. Дагъистаннизи дяхIчиаибти инвестицияла икьалаличил ил арзес пикридикIулра. ИшбархIи жигарчебли гьалабяхI башули саби Дербентла шагьар жагабирнила ва гьалабяхI башахънила программа. Ил гIямрулизиб дурабуркIнила дазурбазир, Дагъистанна югла шайчирти мер-мусаличир бузерила гIяхIцад мерани акIахъесра кьас леб».