Дагъистанна халкьла поэт Фазу ХIямзатовна ГIялиева акIубхIейчирад 90 дус дикнилис хасбарибси вечер, Поэзияла Театрла заллизиб, февральла 28-личиб бетерхур.

—Украинализир детаурти анцIбукьунани, цалабикибтала уркIбазиб байрамла гьав кахIелахъули биалра, бахълизи жявлил багьахъурхIели, балбуц дураберкIес пикрибарилра, – рикIи вечер бузахъуси Залму Батырова.
Гьаланачибал бурес чебиркур, поэзияла байрам чебаэс гIядатла тяхIярли хIядурбарилри. Амма илаб лямцIбикIулри рухIла давла ва пагьмула ахъси даража.
Балбуц ибхьули гъайухъунси Дагъистанна пи­са­тельтала Союзла председатель МяхIяммад ГIяхI­мадовли уркIи –уркIиларад дурибти дугьбани, гьарли-марси халкьла поэт Фазу ГIялиева, пагьмучерсили, уркIи гьаргсили, гIядатла ахIенсили чераахъиб. Марлира, Фазу гIядатла хьунул адам ва поэт ахIенри. Сари-алавси дунъя жагабиахъес, халаси пагьмура бедили, акIахъубси рурги ил Аллагьли.
Нуни Фазу ГIялиевала лерилрара-сера прозала произведениеби делчIунти сари, поэзия гIяхIли хIебалули руилра. Илар зайдухъунти назмуртазибси Фазула уркIила гьаргдешли, ну хIяйранрарира. Муса МяхIяммадовла ва Фазу ГIялиевала назмуртазирти хIялани, гIур чинаралра диэс хIедирар или гьанбикиб. Илди дурхъати, черяхIти пикруми сарри, багьалис асес, кирилис сасес, умцIули даргес хIейрути, ЧевяхIси Аллагьли илдас дедибти, марти дигайличила. Илдигъунти пикрумани, хIяланани сецад давлачердирули, гьарил адамла рухI. Илкьяйда биахъес гьариллис дигахъули бургар, амма илдала назмуртазиртигъунти дигай гьариллис кьадардирули хIедургар. Кьадардиаллира, илданиван уркIи гьаргли, бахъ жагали, чула хIяланачила бурес бахъли бирули хIебургар.
Ахъси гьавлира, гьаргси уркIилира, халаси пагьмулира акIахъубти назмуртани, шихъла бацли дугиван, цалабикибтала уркIби шаладариб. Поэзияла шадлихъличир бутIакьяндеш дариб кIарахъала машгьурти далайчиби: ТI.Курачевли, Д.ХIяжиевли, ГI.МяхIяммадмирзаевли, Р.ХIясановли, М.ГIумарасхIябовани ва цар­хIил­та­нира.
— Фазу ГIялиевани нешличила делкIунти дугьбачил далай бучIухIели, биса дарцдикили, далай белчIес хIейрули калунра, —викIулри РФ-ла урибси гIяртист ТIагьир Курачев. Илини да­лай бучIухIели, кIарахъала мез хIедалули риас­ра, нура нешла рухIличи гъамриахъубра. Ф.ГIя­лие­вала дугьбачил гIуррара гIяхIцад далуйти дел­чIун цархIилти кIарахъала гIяртистунанира. Илди лебилра, цаличиб ца халаси пагьму лебти далайчиби сабри. Илдала далуйтани дунъя жагабирулри, уркIила гьав ахъбирулри, Фазу ХIямзатовнала каргьурти дугьби, гьатIира жагаси лямцIличил халкьличи диахъулри.
Фазуни, сунела творчестволичил, гьаннара бахъал адамтала уркIбачи, гIяхIла шайчиб асарбирули сари. Илини МяхIяммад ГIяхIмадовлизи сага-сагали назмурти лукIахъуливан, далайчиби далайра бикIахъули сари, назмурти дучIути биалли, дунъя дигахъути ва гIяхIти бетарахъули сари, сунела гIелаб батурси пагьмула хазнали, дунъя жагабирахъули сари.
Балбуцличир назмурти дучIути театрла жагьилти гIяртистуначи, Фаина Графченколагъуна машгьурдеш хIерли сари или гьанбикиб. Цаличир цали имцIали жагали делчIес абзлизи кабизуртиван, Фазу ГIялиевала назмурти уркIиличир дяркъурли дучIулри ГI.ГIямаровли, ГI.Кудиевли, А.Айгуновани, П.Маллаевани, Д.Закарьяевани ва цархIилтанира,.
Муса МяхIяммадовла «Ну художник виасри» бикIуси назму белчIун театрла гIяртист Р.Ларинни. Дахъал жагати ранганачил чераахъилри назмулизир Фазу. М.ГIяхIмадовла, Фазу гьанриркахъули белкIунси, сагаси назму, кIарахъала мезличил белчIун Б.ГIябдуряхIмановли. МяхIячкъалала 50 ибил школала учIан С.Салаватовли «Уршиличил ихтилат» бикIуси назму белчIун. Ил вечерличи классла руководитель А.Иманшапиевачил вакIилри.
Ишаб бурес рирус, дила уркIилизи жагьхIей­чи­рад арацIибси, ну-регIси Фазу лерниличилара. Илала прозала жузи, хаслира «КIел кьурч», мур­талра дила някълиуб бирусири. Сели-биалра рачарархахъибхIели, гIяхIси хIяйчи ракIес багьандан, ил нуни някълизи кайсусири. Риш­тIа­хIелила гIямруличила, нешличила, хала неш­личила, унраличила, хьунул адамличила, дургъбас гIер­гъи­ти дусмачила, муруйчилти сунела гIямруличила дел­кIунти хабуртазир, гIямру сари лертиван чедаахъилри. Хабурти марти диъниличи ну рирхули, наб къаршидикибти къияндешуни чекасес гьамадбирулри.
Балбуц шадлихъла аги-хIяйзиб бетерхур.