Гьалабван «Дагъистан» РИА-ла редакцияла «Гьаргси хIукумат» проектла дазурбазив Россияла Пен­сионный фондла ДР-ла от­де­лениела руководитель Мя­хIям­мад ГIисаев журналис­ту­начил гьуниваиб.

«Социальные выплаты» темаличилси пресс-конференцияличиб М. ГIисаевли республикала жами­гIят­лис дедлугути гьар журала пособиеби ва пенсияби адамтачи заманаличир диахъес багьандан, селра диргалахIебулхъан или буриб.
«Илди камтира ахIен. Бурасли, шалгIеббухъунси дусла ахирлизир, улкала Президентла хIукму хIясибли, пенсионертас гьачамцун дедлугути пособиеби нушани 2 бархIила духIнар дутIира».
Илкьяйда МяхIяммад ГIисаев­ла гъай хIясибли, 2023 ибил дус­лизиб Пенсионный фондла у барсбарес пикрибарили саби. Гьала хили бурни хIясибли, илди дарсдешуни дархдасунти сари социальный бяхIчибизла кабизуни челябкьлализир Пенсионный фондличил дархдирхъниличил.
Пенсионный фондлис Социальный фонд или иру. Бурес гIягI­нибиркур М.ГIисаевли бегI гьа­лаб саби ил сагадешличила нушази багьахъурси.
Пресс-конференцияличир илкьяйда цархIилти декIар-декIарти масъултира ахъдуциб: бузерила книжка электронный жураличи шурбатнила, нешдешла капиталла хIекьлизирти ва цархIилти.
Пенсионный фондла отделениела бекIли илкьяйда гьанбушиб 2022 ибил дусла январьла 1-личирад жамигIятлис социальный бяхIчибизлашалси кумек гIеббиахъути тяхIуртазирадти цацадехIти жураби РФ-ла Пенсионный фондли дузахъниличила.
Илди сари: медицинала уч­реж­дениелизи заманаличиб дугьабизурти виштIасиличи баибти хьунул адамтас гьачамцун бедлугуси пособие, сабира организация кутурбиъниличибли хIянчилизибад акьубатурти;
виштIаси акIубхIели хьунул адамтас гьачамцун бедлугуси пособие;
хьунул адамтас виштIасилис къуллукъбирнилис гьар базлизиб бедлугуси пособие;
гIярмицла виштIасиличи раибси хьунуйс гьачамцун бедлугуси пособие;
радиацияличил бархбасунси бехIемцIличибли чула арадеш нукь­санбикибти адамтас гьар базлизиб бедлугуси компенсация ка­бизахъни, бедлугни ва цар­хIил­тира.
Ихтилат ахирличи биркахъули, М.ГIисаевли ит яра иш журала пособие заманаличиб бикахъес багьандан, гIярза чекайзурли, хатIа агарли лукIахъес ва банкла карта чIянкIли гIярзала вегIла уличилси гьалабирхьахъес адамти жибариб.