Гьанбиркули саби гIядатла хъа­либарг. ГIядатла или бурили хьаллира, ил хъалибарг халкьла хабуртазиб бурусигъунари: жагати неш-дудеш, илдала хIябал нарт ва регIлара риштIалгъуна ца исбагьи рурси. Хъалибаргла бекI Шиха СалихIович школа­ли­зив узулри, хабчаб Дирван ЯхIъяевна — шила фельдшерли. Баягъи иличи сабри шантала дурхIни дуцIбикIути, се-биалра изесбяхIибхIели, илдикьяйдали — нура. СенкIун илала сихIрулагъунти някъбани нуша арадирниличи чIумали дирхутири, тяп илкьяйда бетра бетарулри.

Баягъи ил сихIрулагъунти някъбала, жагати чарх-бекIла регI хьунул адам Дирванничила ва илала мурул Шихачила саби наб бурес дигуси иш белкIлизиб. СенкIун Дахадаевла районна Кьункьила шилизибадси ил хъалибарг бахълис гIибратлис гьанбуршес вирар, дила пикрили.
Жагьси Шиха хIяйвантала тухтурли узуси Дирванна дудеш ЯхIъячи, тяп ил узуси мерличи вякьи сай, сунес рурси шери редахъес ибси, тиладиличил.
ЯхIъязи бара школа таманбарибси ургарил рурси Дирван сунес шери редахъес тиладибикIути бахъал лебли биалра, илини сунела рурсилис муруй Шиха чеввикIибсири. Илис гIяхIбизурли бурги Шихала гьарли-марси мурул адамлагъуна баркьуди – илцадра гьамадси ахIенси архIяличи, бегIти яра тухум хIебархьили, сай вакIни. Илкьяйда хъайчикабиибтири Шихара Дирванра.
ЯхIъя (бунагь-хатIа уркадуц) ха­тIа­­хIей­киб. Хъайчикабатурси бар­хIи­ли­чибад, цали ца зугIлумазибад мяхI­кам­бирули, цали ца дигили алавбурцули, хIеркабиуб Шихара Дирванра. Илдала авал дурхIяра акIуб: Алишер, Аликбер, СалихI ва Саира.
БикIуливан, ЧевяхIсини къияндешуни илди чекасес вирусилисцун сари дурхьути. Баягъи илгъуна бетаур иш белкIла игитла хъалибарглисра. Мурала гIеба бируси муруйс кумекбирулра или, гIебала чеди арацIибси Дирван иларадли карикиб ва, къаркъаличи къакъла лига чегили, хIерашанриуб.
Ил анцIбукь илцадра децIагибси Шихани сунела дурхIнала жагьси неш Дирван ил бархIил гьала-гьала районна больницализи, гIур МяхIячкъалализи сарукиб ва бегIлара бурибти тухтуртази ахтардирарахъиб, амма селра барес хIейуб, ва Дирван гIямрулис чулахъли калун.
Ил анцIбукьла къияндеш илданицун гIячихъли иргъулри. Халакабаибти уршби хъайчикабатес гIягIнилири. Школализир ручIули лералси цайли цаси рурси Саирачи лерилра нешла хIянчи – хIяйвантачи хIеруди бирнила, хъулиб умудеш бирнила, хъалибарглис беркеси хIядурбирнила — хъардикиб. Илди хIянчила дурарад, ахъриэс хIерируси нешлисра кумекбирулри илини, халати хIянчурбачибхIели.
Узбасра дудешлисра илкьяйда гьамадли ахIенри, амма хъалибаргла балгундешла гIяхIдешличибли илдас къияндешуни черардукес имканбакIиб. Шихани, сайра узули, халати уршбира бузахъулри. Багьла-багьлали уршби хъайчикабатур, рурсира шери редиб.
Илди къуллукъунала дурабад, бурушларси хьунуйсра хIеруди гIягIнилири. Ил шайчивра Шиха сенрил бажардииркулри. Ца игъбар — Дирванна рузи Марият гъамли хIеррирни. ЦацахIели илра рашулри рузи разес, яра цархIил кумек гIягIнибикалри. Неш Мунажатра, бунагь-хатIа уркадуц, рируцадхIи кумекбирули калун.
Илкьяйда я бурушларад аризес, я кумек агарли коляскаличи кариэс хIерируси сунела хьунуйчи хIеруди бирули, Шиха 25 дусра имцIара калун. Дирванна тухум ва сари Шихази хIед цархIил хьунул кариахъес ихтияр лугулра бикIули хьаллира, илини илдигъунти гъай пикрихIедариб.
Сецад хIейгеси биалра, гьалавван, 2020-ибил дусла ахирлизив, ратурли сунес ахIерси Дирванра, дурхIнира, дурхIнала дурхIнира, берхъибси хъалибаргла бекI Шиха 65 дусла гIямруличив итил дунъяличи шалгIевухъун. ИлхIелира хьунул савли дубруцахъес или, илис беркеси хIядурбирули, кухнялизив вархибси илала уркIи тIашбизурлири.
Ил бетахъри Дирваннис сецад децIагиб биалра, шишимтачирли гьатIира декIли зягIипхIерикес ва дурхIнас бекIмаххIерухъес бажардибирули сари, малхIямси девличил, мурхьси гIякьлуличил дурхIни гIеббурцули сари. ДурхIнанира ил цунрулхъахъули ахIен – гIяхIси хIеруди бирули саби виштIалгъуна урши СалихIли, илала хьунул Алинани ва цархIилти дурхIнанира, илдала акIубтанира.
Дагъистанна мурул адамтани гIергъити дусмазиб хъалибаргла кьиматчебдешличила хъумуртули саби. ЦацабехIтани, чула хьунразиб баралра нукьсандеш чебаибмад, биштIати лебниличира хIерхIеили, цархIил хьунуйгIиб умцIес бехIбирхьули саби.
БикIуливан, мурул адам жагавируси чарх-бекIли ахIенну, илала баркьудлумани сай. Шихани баягъи сунела баркьудлумачил, сунела уркIила жагадеш чедаахъиб ва уршбасра гIяхIси гIибратли ветаур.
Дигахъаси, Шихагъунти мурул адамти нушала республикализибра улкализибра бахъбикIули, сегъунти къияндешуни чедуркъалра, илди гьачам черрикIибси риганайлис даимлис мартили кавлули.
АхIерси Дирван ЯхIъяевна, мартла 8-личиб дурабуркIуси хьунул адамтала байрамличил уркIи-уркIиларад мубаракрирулри! ГIур мурткIал къиянмадикаб, гъамтани гьар бархIи харирираби, талихI ва разидеш каммадиаб хIела хъалибарглизир!