Ишди бурхIназиб лебил Россияла жамигIятла «Народный фронт «За Россию» ибси хIяракатла шайзирадли сабухъчебли бузути журналистунас шабагъатуни дедиб.
Дигеси саби «Дагестанская правда» газетала хIянчизар, Хайдакьла районнизирадси Хасайбат Меджидовара иличи лайикьрикни. Дагъистан Республикализибси ОНФ-ла регионна штабла Сопредседатель, Дагъистанна пачалихъла аграрный университетла ректор Жамбулатов Зайдин МяхIяммадовичли илис Баркаллала кагъар бедиб. Россияла журналистуни-ургаб дураберкIибси «Правда и справедливость» ибси конкурсличиб чедибикибти 437 журналистлизирадли ца сари Х.Меджидова. Лебтанилра балуливан, илини мурталра республикала ва Федерацияла даражала декIар-декIарти конкурсуначир жигарла бутIакьяндеш диру ва цацадехIтазир гьаларти меранира сархули рирар. Нушанира илис гьаннала гIергъира пагьмулашалси бузерилизир халати сархибдешуни дулгехIе!
Буралли, илкьяйдали Хайдакьла районна администрацияла бекIла пресс-секретарь Саида МяхIяммадсягIидовасра Баркаллала кагъар касес имканбакIиб.
ГьанбиркахъехIе, Сагаси Дуслис гьаларти бурхIназиб илис социальный сетаназиб ункъли хIянчи дурабуркIнилис ДР-ла регионнис гьуни чебиахънила Центрли илини 12 дус мерличибси телевидениелизиб, «Хайдакьла зяхIматчи» газетала редакциялизиб гIяхIси хIянчи барни багьандан Грамотара бедибсири. БусягIятра районна администрацияла пресс-службализир рузули сари. Саидас ил 4-эсил шабагъат саби бедибси. Илала хIянчи ахъли кьиматлабирули, районна администрацияли, Дагъистан Республикала печатьла ва миллатла политикала шайчирти багьахънибала министерствобани ХIурматла Грамота ва Баркаллала кагъар дедили сари.
Хайдакьла районна бекI ГIялим Темирбулатовли Саида МяхIяммадсягIидова мубаракрариб: «Хъарси хIянчи чебетаахъили бирули, хIуни районна хIякимтала регионна СМИ-бачилси бархбас ахъси даражаличиб дурабуркIулри. ХIуни лерилра сагати хабурти жагали далкьаахъурти видеоличил, суратуначил ва текстаначил гьаладирхьулри. Иличибли азирти адамтас аргъбаибти ва заманаличи далдикибти баянти диахъулри. ВегIла ватIайчи гьарли-марти диги лернилис, чеббикIибси санигIятлис мардеш дирнилис ва ил ункъли балнилис баркалла! ХIед чIумаси арадеш, кахIебурхуси талихI ва гьарбизуни диубли дигулра!»
