Россия бегI гьалаб жигарчебли вак­цинацияла хIяракат дехI­ди­хьибти улкназибад цаибсили бетаур. Ва «Спутник V» вакцинали аги-кьяйдализиб урехи агни ва сунела асар­чеб­деш чедаахъиб. ГIе, тухтуртани бу­ру­ливан, илини 100 процентлизиб ко­ро­на­ви­руслизибад мяхIкамдеш би­рули ахIен. Амма, адам зягIипикили хьал­ли, изала кункли чебарбукьяхъес им­кан­бикIур.

Коронавирусла сагаси «Омикрон» бикIуси штаммлис къаршидеш дирнила шайчиб «Спутник V» вакцинала асарчебдеш 75 процентличи абиркули саби или багьахъур Гамалейла уличилси НИЦ-ла руководитель Александр Гинцбургли.
«Сагаси штаммличи «Спутник V» вакцинали гIяхIси къаршидеш алкIахъули саби. Эгер, замана арбякьунхIели, «Спутник Лайт» вакцина гьатIира барахъалли, «Омикрон»-низибад 100 процентлизиб мяхI­камдеш бирар», — бурули саби илини.
А.Гинцбургла гъай хIясибли, чейхъуси изайзибад урехи хIебиахъес багьандан, илдигъунти даражала тяхIяр-кьяйда даибти сари. «ИшбархIи нушала халаси асарла бегI вакцина леб, сабира бархьли пайдалабаралли, халкь мяхIкамбирнила лерилра мурадуни тамай детерхахъес имканбикIахъуси», — викIи ил.
А.Гинцбургли бурни хIясибли, вакцинаби алкIахъухIели, гьаланачирал декIар-декIарти тяхIурти пайдаладирутири. Россияла дарман балкьарахъухIели, пайдаладарибти тяхIуртани, ил иза жура-журала штамманас къаршидеш дирнилизибра асарчебли кавлахъули саби.
Вирусолог Александр Чепурновла баянти хIясибли, «Омикрон» штаммличил Россиялизиб адамти имцIали зягIипбиркни хIисаббирар февральличиб. Илини буриливан, «Омикрон»-нис илис гьалабси коронавирусла журалис гьалабухъес имканбикIур, сенахIенну ил хъярхъли тIинтIбикIни багьандан.