ХIебли ва вава-кьар­ли ванза жа­габируси биал­ли, гIякьлу мурхьти, багьуд­лу­мачилти адамтани дунъя жа­­га­бируси саби. Кабиз­ли­­зир­ра уржибси, жага­деш­ли­зирра чисалра гIела­хIе­рул­хъуси, гIилмулизи мурхь­­­рикибси ДГПУ-ла фило­ло­гияла мезанала кафед­ра­ла заведующая, доцент, фило­логияла гIилмуртала кан­ди­дат ХIябибуллаева Па­тIи­мат Мя­хIям­мадовнани набзи ил­ди­гъунти пикруми хьура­ди­ахъуб.

Илини нура набчил варх Сириялизи­вад гIяхIладли вакIибси писатель, тилмаж Ибрагьим Истанбулира ДГПУ-ла филологияла студентуначил гьунибаъни дураберкIахъес жида­рира. Балбуцличир фило­логияла кафед­рала доцент МяхIяммад Илья­совли, Дагъистанна ме­занала ка­фед­рала доцент Ашурали ГIя­ди­ловли ва цархIилтанира бу­тIа­кьян­деш дариб. Гьайгьайрагу, И.Истанбулини гIяра­бу­нала мезличи шурдатурти Дагъистанна ва урусунала писательтала-поэтунала назмурти делчIун. Нунира дила назмурти делчIунра. Ибрагьимли Сириялизибси дергъли къиянси агиличи бикахъибси улкаличила, адамтала кьисматуначила гIяхIцад хабурти дуриб. Севан къиянти шуртIразиб хIербиралра, илди культуралис гIелабулхъули ахIен: жузи исули сари ва дучIули сари, хаслира Р.ХIямзатовла «Дила Дагъис­тан» бегIлара дигуси жузли бетаурли саби. Ибрагьимли лерилра назмуртала антология цалабяхъили, Каирлизиб дураиб.
Студентунани ва преподавательтани И.Истанбулизи гIяхIцад суалти хьардаиб ва гIуррара назмурти делчIахъес тиладибариб. Илгъуна уржибси ва шаласи гьунибаъниличи лебилра разилири.
П.ХIябибуллаева дахъал гъай хIей­гу­си, паргъатти хIял-тIа­бигIятла адам сари. Дахадаевла районна сир­хIяла дубуртази мерлабиубси Ур­гIе­рил­а шилизир акIубси рурсили дубурлантала гIямру, тIабигIят ункъли далулри. Ил гьанна шагьарлан ретаурли риалра, дубурлантала дурхъати гIядатуни дузахъули сари.
П.ХIябибуллаевани Ур­гIе­рила урга даражала школа ункъли таманбариб. Илис бегIлара дигути дурсри сарри – урус мез ва литература. Илди дурсрала учительница З.СягIидовара ПатIиматлис нешван дигахъусири. Илдачирти дигили ПатIимат ДГПИ-ла (гьанна университет) филологияла факультетла урусла-даргала отделениелизи карерхахъур. Вузра ункъли хъараахъурли, ДГПИ-лизир рузес рехIрихьиб. Мезанала ка­федрала заведующий З.Загьировла бекI­дешлиуб, ПатIиматли «СирхIянтала лугъатла, дарган мезла фразеологияла черкад умцIлаби» бикIуси гIилмула-ахтардила хIянчи бетерхахъур.
П.ХIябибуллаева, дарган мезла, дарган мезла тарих ва лугъатуни руркънила дурсри кадирхьули, 21 дус ДГПУ-лизир преподавательли рузули сари. Илди дусмала духIнар илини дурхIназир неш­ла мезличи диги адикьур. Вуз хъараахъурти дурхIни даргала шимазиб мугIяллимтили бузули саби.
БусягIятла манзил нешла мез детихъниличи нуша лерилра кьакьадикIулра. Илди мяхI­кам­дарес ва дурхI­нази руркъя­хъес халати къайгъни лер Па­тIимат­ла­ра.
Студентунала гIялимтачил, писательтачил чуйнара гьунабаъниби дурадеркIиб, илкьяйдали даргала шима­зира дурхI­на­чил рякьун. П.ХIя­би­буллаева гIергъити хIябал дусра-сера ме­занала кафедрала заведующаяли ру­зу­ли сари.
ПатIиматли ХI.ГIялиевла литература мурхьли бяркъур ва, илала произведениеби хIясибли, докторла хIянчи кабизахъес къайгъилизир сари. Сунела бузерилизир илис сархибдешуни дулгулра. Апрельличиб дарган мезлис хасбарибси балбуц дураберкIесра кьасани лер илала. Гьалабра илгъуна балбуц байрамличи шурбухъунсири. Баркалла биаб нушала сирхIян рурси ПатIиматлис.

 

АхIенри хIу гIядатла

СирхIяла дубуртазир
ГIяхIгъубзнала къяйлизир,
Пахрула ва пагьмула
Сарри ПатIимат хIура.

ХIела дагьрила давла
ГIяйбиуб Даргазира,
ХIед балгнани булгули
Саб даргала рузбира.

ХIеррирулри гъабзаван
ГIямулти хIедагьурли,
Дарган гIилмула дурсри
ХIисабтиван дагьурли.

Ахъанайтиван ахъли
ДихIули адамдешра,
Кьуръа аятуниван
Дяркъурли гIилмуртира.
ХIеррирулри, багьадур
Багьа ахъли бихули,
БегIтала аманатлис
Мар мургьиван умули.

ХIела дурхъаси ура
АхIен кьалли гIядатла,
Дурхъал Идбагла нешла
У саби баракатла.

ЦIала тIякьгъунти уршба
Ахъбиахъуб Кавказра,
ХIугъунти къуймуртани
Къугъабариб СирхIяра.
***
Дубуртази СирхIяла
Зубарта урзибара,
ХIела хIулбази севан
Хьуракадиубара?…

Даргала дубуртази
ЗурхIябти кагибара,
ЗурхIябтала рангани
ХIези сен ацIибара?

ГIярбукIан арцла уста
АхIенри хIела аба,
Къалиплизи мургьила
Севан карихьирира?

Модаби, Мадоннаби
Се саби хIела гьалаб,
ЧерикIла исбагьиби
СирхIязиб акIубти саб.